ഹുമനയോസും ഫിലേത്തോസും പുനരുത്ഥാനത്തെ പറ്റിയുള്ള ക്രൈസ്തവ വിശ്വാസവും.

ക്രിസ്തുവിൽ പ്രിയരെ,

ഭവിതവാദത്തെ (പ്രെട്രിസത്തെ) ദുഷിക്കുന്നവർ പരക്കെ ഉപയോഗിക്കുന്ന ഒരു വേദഭാഗമാണ്:

2തിമോ 2:18 ഹുമനയോസും ഫിലേത്തോസും അവരുടെ കൂട്ടത്തിൽ ഉള്ളവരാകുന്നു; അവർ സത്യം വിട്ടു തെറ്റി പുനരുത്ഥാനം കഴിഞ്ഞു എന്ന് പറഞ്ഞ് ചിലരുടെ വിശ്വാസം മറിച്ചുകളയുന്നു.

ഹുമനയോസും ഫിലേത്തോസും നടത്തിയിരുന്ന തെറ്റ് പുനരുത്ഥാനം കഴിഞ്ഞു എന്ന് പഠിപ്പിക്കുന്നതാണ്.

ഭൂരിഭാഗം ക്രൈസ്തവരും വിശ്വസിക്കുന്നത് പോലെ ശാരീരികമായ പുനരുത്ഥാനത്തിൽ പൌലോസോ, തിമൊഥെയൊസോ, ആദിമ സഭയോ വിശ്വസിച്ചിരുന്നെങ്കിൽ ഹുമനയോസും ഫിലേത്തോസും പഠിപ്പിക്കുന്നത് തെറ്റാണെന്ന് തെളിയിക്കുന്നത് വളരെ ലളിതമായിരുന്നു:

“അച്ചായന്മാരേ, അമ്മച്ചിമാരേ, നിങ്ങൾ ആ ശവക്കോട്ട വരെ പോയി ഈയിടെ മരിച്ചുപോയ നിങ്ങളുടെ അപ്പച്ചനോ അമ്മച്ചിയോ കുഴിയിൽ (കല്ലറയിൽ) ഉണ്ടോ എന്ന് നോക്കിക്കേ.”

എന്ന് പറഞ്ഞാൽ പരിഹരിക്കാവുന്ന കാര്യമേയുള്ളൂ. ആരുടെയും വിശ്വാസം മറിഞ്ഞുപോകുകയുമില്ല.

അന്തിമമായ പുനരുത്ഥാനം ശാരീരികമായ പുനരുത്ഥാനമാണെങ്കിൽ ഹുമനയോസും ഫിലേത്തോസും നടത്തിയിരുന്നത് ദുർബോധനയാണെന്ന് തെളിയിക്കുന്നത് അനായാസമായിരുന്നു. അങ്ങനെയല്ലാത്തതിനാലാണ് പൌലോസ് കാര്യങ്ങൾ ബോധിപ്പിക്കുവാൻ കഷ്ടപ്പെട്ടത്. (അന്തിമമായ പുനരുത്ഥാനം എന്ന പദസമുച്ചയത്താൽ യേശുവും ശിഷ്യന്മാരും ഉയിർത്തെഴുന്നേൽപിച്ച ലാസർ അടക്കമുള്ള നിരവധി പേരുടെ പുനരുത്ഥാനത്തെയല്ല ഉദ്ദേശിക്കുന്നത്. അന്ന് ഉയിർപ്പിക്കപ്പെട്ട ആരും സ്വർഗാരോഹണം ചെയ്തതായോ, അനശ്വരരായി ജീവിച്ചതായോ തെളിവില്ലല്ലോ?)

ക്രിസ്തുവിൽ,
ടോംസാൻ കട്ടക്കൽ