“ശൂന്യമാക്കുന്ന മ്ലേച്ഛത” - ④ - 1290 ദിവസങ്ങൾ, 1335 ദിവസങ്ങൾ

ക്രിസ്തുവിൽ പ്രിയരെ,

ഇത് “ശൂന്യമാക്കുന്ന മ്ലേച്ഛത” എന്ന പരമ്പരയിലെ നാലാമത്തെ ലേഖനമാണ്. ഒന്നും, രണ്ടും, മൂന്നും ഭാഗങ്ങൾ വായിക്കാതെ ഇത് വായിച്ചിട്ട് പ്രയോജനമില്ല.

ഈ ലേഖനം എഴുതുവാൻ മൂന്ന് ആഴ്ച വേണ്ടിവന്നു. എൻറെയും മൃതപ്രായനായ എൻറെ കംപ്യൂട്ടറിൻറെയും ക്ഷയോന്മുഖമായ ആരോഗ്യം മാത്രമല്ല ഈ താമസത്തിന് കാരണം. ഈ ലേഖനം കഴിയുന്നത്ര വസ്തുനിഷ്ഠവും മറ്റാരുടെയെങ്കിലും സ്വാധീനമില്ലാത്തതും ആയിരിക്കണം എന്ന പ്രാർത്ഥനാപൂർവകമായ ആഗ്രഹവും പ്രയത്നവുമാണ് ഈ താമസത്തിന് കാരണം. വളരെയധികം വെട്ടലുകളും തിരുത്തലുകളും നടത്തിയിട്ടും ഈ ലേഖനത്തിൻറെ ദൈർഘ്യം കുറയ്ക്കുവാൻ കഴിയാത്തതിൽ ഖേദിക്കുന്നു.

---

ഈ ഭാഗം വായിക്കുമ്പോൾ വ്യക്തമായി ഓർമ്മിക്കേണ്ട സംഗതികൾ:

• ഈ ലേഖനത്തിൻറെ നിഗമനങ്ങൾ അവസാന വാക്കല്ല.
• മുമ്പ് പറഞ്ഞിട്ടുള്ളത് പോലെ, ഹീബ്രൂ കലണ്ടറിൻറെ അവ്യക്തതയും ജോസഫസിൻറെ രേഖകളിൽ തിയ്യതികൾ വ്യക്തമായി രേഖപ്പെടുത്താത്തതും വ്യക്തമായ നിഗമനങ്ങളിൽ എത്തുന്നതിന് തടസ്സമാണ്.

---

മത്താ 24:15ൽ യേശു പരാമർശിച്ചത് ദാനീ 12:11 ആണെന്ന് നാം മുൻ ലേഖനങ്ങളിൽ കണ്ടു.

മത്താ 24:15 എന്നാൽ ദാനീയേൽ പ്രവാചകൻ മുഖാന്തരം അരുളിച്ചെയ്തത് പോലെ ശൂന്യമാക്കുന്ന മ്ലേച്ഛത വിശുദ്ധസ്ഥലത്തിൽ നിൽക്കുന്നത് നിങ്ങൾ കാണുമ്പോൾ” - വായിക്കുന്നവൻ ചിന്തിച്ചു കൊള്ളട്ടെ -
Mat 24:15 When ye therefore shall see the abomination of desolation[G2050], spoken of by Daniel the prophet, stand in the holy place, (whoso readeth, let him understand:)

---

ശ്രദ്ധിക്കപ്പെടാതെ പോയ “വരെ”.

ദാനീയേൽ 1211-12ൽ വിവരിക്കപ്പെട്ടിട്ടുള്ള സംഭവങ്ങൾ നിറവേറിത്തീരേക്കേണ്ടത് വിശുദ്ധ ജനത്തിൻറെ ബലം തകർത്തുകളയപ്പെടുന്ന കാലത്താണ്. (ദാനീ 12:7, തകർത്തുകളഞ്ഞ ശേഷമാണ് എന്ന് മലയാളം വേദപുസ്തകം. ഈ ലേഖനപരമ്പര പല പരിഭാഷകൾ താരതമ്യം ചെയ്തുനോക്കിയ ശേഷമാണ് തയ്യാറാക്കിയിട്ടുള്ളത്.)

ശൂന്യമാക്കുന്ന മ്ലേച്ഛത എന്താണെന്ന് കണ്ടുപിടിക്കുവാനുള്ള വ്യഗ്രതയിൽ ഭവിതവാദികളും ഭവിഷ്യവാദികളും ഒരുപോലെ ശ്രദ്ധിക്കാതെ പോയ ഒരു കാര്യമാണ് ദാനീ 12:11ൽ “വരെ” എന്ന വാക്കില്ല എന്നത്.

ദാനീ 12:11 നിരന്തര ഹോമയാഗം നിറുത്തലാക്കുകയും ശൂന്യമാക്കുന്ന മ്ലേച്ഛബിംബത്തെ പ്രതിഷ്ഠിക്കുകയും ചെയ്യുന്ന കാലം മുതൽ[H4480] 1290 ദിവസം ചെല്ലും.
Dan 12:11 [KJV] And from[H4480] the time that the daily[H8548] sacrifice shall be taken away, and the abomination that maketh desolate[G2050] set up, there shall be a thousand two hundred and ninety days.
Dan 12:11 [YLT] and from the time of the turning aside of the perpetual sacrifice , and [to] the giving out of the desolating abomination, are days a thousand, two hundred, and ninety.
ദാനീ 12:11 1335 ദിവസത്തോളം കാത്തു ജീവിച്ചിരിക്കുന്നവൻ ഭാഗ്യവാൻ.

ഇവിടെ രണ്ട് സംഭവങ്ങൾ പരാമർശിക്കപ്പെട്ടിട്ടുണ്ട്:

1. ഹോമയാഗങ്ങൾ നിറുത്തലാക്കുന്നതും
2. മ്ലേച്ഛത സ്ഥാപിക്കപ്പെടുന്നതും.

ഇവയെ ബന്ധിപ്പിക്കുവാൻ ദാനീ 12:11ൻറെ ഗ്രീക്ക്, ഹീബ്രൂ പാഠങ്ങളിൽ “മുതൽ” (from, H4480) എന്നതിന് തത്തുല്യമായ വാക്ക് ഉണ്ട്, പക്ഷേ, “വരെ” (to) എന്നതിന് തത്തുല്യമായ വാക്ക് ഇല്ലാതിരിക്കുന്നത് യാദൃച്ഛികമായി സംഭവിച്ചതാവാൻ തരമില്ല. ഒരുപക്ഷേ, ദാനീയേലിനെ പ്രവചനം എഴുതുവാൻ പ്രചോദിപ്പിച്ച പരിശുദ്ധാത്മാവ്, പ്രവചിതമായ കാലത്തെ കലുഷിതമായ സംഭവങ്ങൾ മുന്നിൽ കണ്ടതിനാലാകാം ഇങ്ങനെ സംഭവിച്ചത്.

ദാനീയേൽ ഇത്തരം വിശദാംശങ്ങളിൽ ശ്രദ്ധാലുവാണ്. ഉദാഹരണമായി:

ദാനീ 9:25... “യെരൂശലേമിനെ യഥാസ്ഥാനപ്പെടുത്തി പണിയുവാൻ കൽപന പുറപ്പെടുന്നത് മുതൽ അഭിഷിക്തനായ ഒരു പ്രഭു വരെ...”
Dan 9:25 ...from<H4480> the going forth of the commandment to restore and to build Jerusalem unto<H5704> the Messiah...

എന്ന് എഴുതിയിരിക്കുന്നതിൽ “മുതൽ”, “വരെ” എന്നീ വാക്കുകൾ കൃത്യമായി ഉപയോഗിക്കപ്പെട്ടിട്ടുള്ളത് ശ്രദ്ധിക്കുക.

മുകളിൽ സൂചിപ്പിച്ച അഭാവം പരിഗണിക്കാതെയാണ് പലരും ഈ വേദഭാഗത്തിൽ നിന്നും 1290 ദിവസങ്ങളുടെയും 1335 ദിവസങ്ങളുടെയും കൃത്യമായ അവസാനം കണ്ടെത്തുവാൻ ശ്രമിക്കുന്നതും, മറ്റൊരാളുടെ കണ്ടുപിടുത്തത്തേക്കാൾ എൻറെ കണ്ടുപിടുത്തമാണ് എന്ന് മേനി നടിക്കുന്നതും.

“നിരന്തര ഹോമയാഗം”

ഈയിടെ പാസ്റ്റർ സജിത് ജോസഫും, പാസ്റ്റർ അഭിലാഷ് രാജും തമ്മിൽ നടന്ന ചർച്ചയിൽ പാസ്റ്റർ അഭിലാഷ് രാജ് ഈ വചനത്തിൽ നിരന്തര ഹോമയാഗത്തെ പറ്റിയല്ല പരാമർശിച്ചിരിക്കുന്നത് എന്ന് വാദിച്ചു. അദ്ദേഹത്തിൻറെ അഭിപ്രായത്തിൽ നിരന്തരമായ എന്തോ ഒന്ന് നിറുത്തപ്പെടും എന്നാണ് ഈ വചനം വിവക്ഷിക്കുന്നത്. അദ്ദേഹം ഇങ്ങനെ പറയുവാൻ കാരണം: ഹോമയാഗം എന്നതിന് തത്തുല്യമായ ഹീബ്രൂ പദം ഈ വചനത്തിൽ ഉപയോഗിച്ചിട്ടില്ല എന്നതാണ്. [ഹോമയാഗം എന്ന പദം പരിഭാഷകർ ചേർത്തതാണ്] ആ വാദം ശരിയാണെങ്കിൽ ദാനീയേലിൻറെ പ്രവചനത്തിൽ ഒരിടത്തും അത്തരത്തിൽ ഒരു പദം ഉപയോഗിച്ചിട്ടില്ല [ദാനീ 8:11, 12, 13, 9:27, 11:31, 12:11,], എന്നിട്ടും അന്തിയോക്കസ് എപ്പിഫാനസിൻറെ കാലത്ത് ഹോമയാഗങ്ങൾ നിറുത്തപ്പെട്ടില്ലേ?

ശൂന്യമാക്കുന്ന മ്ലേച്ഛത റോമൻ സൈന്യമല്ല.

ദാനീയേൽ 12:11 വ്യാഖ്യാനം ചെയ്യുന്നതിലെ ഏറ്റവും വലിയ വെല്ലുവിളി നമ്മുടെ മുൻവിധികളാണ്. ശൂന്യമാക്കുന്ന മ്ലേച്ഛതയെ പറ്റി പരാമർശിച്ചിരിക്കുന്ന മത്താ 24:15; മർക്കോ 13:14 എന്നീ വചനങ്ങൾക്ക് സമാന്തരമായ ലൂക്കോ 21:20 ഇങ്ങനെയാണ്:

ലൂക്കോ 21:20 സൈന്യങ്ങൾ യെരൂശലേമിനെ വളഞ്ഞിരിക്കുന്നത് കാണുമ്പോൾ അതിൻറെ നാശം അടുത്തിരിക്കുന്നു എന്ന് അറിഞ്ഞുകൊള്ളുവിൻ.
Luk 21:20 And when ye shall see Jerusalem compassed with armies, then know that the desolation [G2050] thereof is nigh.

മത്താ 24:15; മർക്കോ 13:14 എന്നീ വചനങ്ങളിൽ “ശൂന്യമാക്കുന്ന” എന്ന് പരിഭാഷപ്പെടുത്തിയിരിക്കുന്ന അതേ ഗ്രീക്ക് പദം (സ്ട്രോങ്സ് നിഘണ്ടുവിൽ G2050) തന്നെയാണ് ലൂക്കോ 21:20ൽ “നാശം” എന്ന് പരിഭാഷപ്പെടുത്തിയിരിക്കുന്നത്. ഈ പദം പുതിയനിയമത്തിൽ വേറെ എവിടെയും ഉപയോഗിക്കപ്പെട്ടിട്ടില്ല. അതുകൊണ്ടുതന്നെ ഈ മൂന്ന് വചനങ്ങളും ഒരേ സംഭവത്തെയാണ് സൂചിപ്പിക്കുന്നത്. (ഗ്രീക്ക് സെപ്റ്റ്വജിൻറിൽ ദാനീ 9:27; 12:11 എന്നീ വചനങ്ങളിലും “ശൂന്യമാക്കുന്ന” എന്നതിന് ഇതേ വാക്ക് ഉപയോഗിച്ചിരിക്കുന്നത് നമ്മുടെ നിഗമനം ശരിയാണെന്ന് ഉറപ്പുതരുന്നു.)

ഈ ഒരു സമാന്തരത്വം നിമിത്തം ശുന്യമാക്കുന്ന മ്ലേച്ഛത റോമൻ സൈന്യമായിരുന്നു എന്ന് പഠിപ്പിക്കുന്നവരുണ്ട്. (ഞാനും അങ്ങനെ ധരിച്ചിരുന്നു.) ജാതികളായ റോമർ യെഹൂദരുടെ വീക്ഷണത്തിൽ മ്ലേച്ഛരായിരുന്നു എന്നതാണ് നിഗമനം. റോമൻ സൈനികർ അത്തരത്തിൽ മ്ലേച്ഛരായിരുന്നെങ്കിൽ അവരിൽ ഒരു ശതാധിപൻ നിർമ്മിച്ച പള്ളി (സിനഗോഗ്, ലൂക്കോ 7:5) എങ്ങനെ യെഹൂദർക്ക് സ്വീകാര്യമാകും? എന്ന ചോദ്യത്തിന് ഉത്തരം കണ്ടെത്തേണ്ടിവരും.

മത്താ 24:15ലും മർക്കോ 13:14ലും ശൂന്യമാക്കുന്ന മ്ലേച്ഛത വിശുദ്ധസ്ഥലത്തിൽ നിൽക്കുന്നതിനെ പറ്റി സംസാരിക്കുമ്പോൾ ലൂക്കോ 21:20 സൈന്യം യെരൂശലേമിനെ വളഞ്ഞിരിക്കുന്നതിനെ പറ്റിയാണ് സംസാരിക്കുന്നത് എന്നത് ശ്രദ്ധിക്കുക - അതായത്, സൈന്യം ഇനിയും വിശുദ്ധസ്ഥലത്തിൽ എത്തിയിട്ടില്ല, അതുകൊണ്ടുതന്നെ, റോമൻ സൈന്യമായിരുന്നില്ല ശൂന്യമാക്കുന്ന മ്ലേച്ഛത.

ശൂന്യമാക്കുന്ന മ്ലേച്ഛതയെ പറ്റിയുള്ള ദാനീയേലിൻറെ പ്രവചനങ്ങളിൽ വ്യക്തമായ ഒരു ക്രമമുണ്ട് (ദാനീ 11:31; 12:10):

• ഹോമങ്ങളും ബലികളും നിറുത്തലാക്കപ്പെടും
• ശൂന്യമാക്കുന്ന മ്ലേച്ഛത സ്ഥാപിക്കപ്പെടും.

റോമൻ സൈന്യമാണ് ശൂന്യമാക്കുന്ന മ്ലേച്ഛതയെന്ന് അവകാശപ്പെടുന്നവർ ഈ ക്രമം തെറ്റിക്കുന്നുണ്ട്. സെസ്റ്റ്യസ് ഗാലസ് എന്ന റോമൻ സൈന്യാധിപൻറെ കീഴിൽ റോമൻ സൈന്യം ക്രി.പി.66ൽ യെരൂശലേമിനെ വലയംചെയ്തതാണ് ശൂന്യമാക്കുന്ന മ്ലേച്ഛത എന്ന് അവകാശപ്പെടുന്നവരുണ്ട്. ഈ സംഭവത്തിന് വേദപുസ്തകത്തിലെ പല പ്രവചനങ്ങളുമായും ബന്ധമുണ്ടെങ്കിലും, വെറും 9 ദിവസം മാത്രം നീണ്ടുനിന്ന ഈ ആക്രമണത്തിന് യെരൂശലേമിനെ പിടിക്കുവാൻ കഴിഞ്ഞില്ല. “അവ്യക്തമായ” (for reasons which remain obscure - Wikipedia) കാരണങ്ങളാൽ സെസ്റ്റ്യസ് ഗാലസ് പിൻവാങ്ങി. റോമൻ സൈന്യം നടത്തിയ ഈ ചെറിയ ആക്രമണത്തെ ശൂന്യമാക്കുന്ന മ്ലേച്ഛതയായി കണക്കാക്കുവാൻ കഴിയില്ല. (സെസ്റ്റ്യസ് ഗാലസ് ഏതാനും ദിവസത്തെ ആക്രമണത്തിന് ശേഷം തിരിച്ചുപോയത് മത്താ 24:22ൽ “ആ നാളുകൾ ചുരുങ്ങാതിരുന്നാൽ ഒരു ജഡവും രക്ഷിക്കപ്പെടുകയില്ല” എന്നതുമായി കൂട്ടിവായിക്കാം എന്ന് കരുതുന്ന പണ്ഡിതന്മാരുണ്ട്. )

ഹോമയാഗങ്ങൾ നിറുത്തപ്പെട്ടത് ക്രി.പി.66 ജൂലൈയിൽ.

ഒന്നാം നൂറ്റാണ്ടിൽ ഹോമയാഗങ്ങൾ അവസാനിച്ചതിനെ പറ്റി പഠിക്കുമ്പോൾ മിക്കവാറും പേർ അവഗണിക്കുന്ന കാര്യം യെഹൂദരുടെ ആചാരങ്ങളുടെ ഭാഗമായി അർപ്പിക്കപ്പെട്ടിരുന്ന ഹോമയാഗങ്ങൾക്ക് പുറമേ, ഭരണാധികാരികൾക്കും രാജാക്കന്മാർക്കും വേണ്ടി ഹോമയാഗങ്ങൾ അർപ്പിക്കപ്പെട്ടിരുന്നു എന്നതാണ്. (ലേവ്യ 9:23; 2ശമു 6:18; 1ദിന 16:2, 3). റോമൻ രാജാക്കന്മാരുടെ ഭരണകാലത്ത് ഈ ആചാരം പ്രബലമായിരുന്നു എന്നുവേണം കരുതുവാൻ.

ക്രി.പി.66ൽ ദേവാലയത്തിൻറെ അപ്പോഴത്തെ ഭരണാധികാരിയായിരുന്ന അനന്യാസിൻറെ മകൻ എലെയാസർ അന്യജാതികൾക്ക് (റോമൻ രാജാക്കന്മാർ അടക്കം) വേണ്ടിയുള്ള ഹോമയാഗങ്ങൾ നിറുത്തിവെക്കുവാൻ ദേവാലയത്തിലെ വിചരിപ്പുകാരെ നിർബന്ധിച്ചു. ഈ സംഭവം ഹീബ്രൂ കലണ്ടറിലെ അവ് (Av, ജൂലൈ-ആഗസ്‌ത്‌) മാസത്തിലാണ് നടന്നത്. (ജോസഫസ്, യെഹൂദരുടെ യുദ്ധങ്ങൾ: പുസതകം 2, അദ്ധ്യായം 17, ഭാഗം 2 - 7). ഇത് നടന്നത് സൈലോഫോറി (Xylophory - Tu B'Av) എന്ന പെരുന്നാളിന് മുമ്പാണെന്ന് ജോസഫസ് വ്യക്തമായി സൂചിപ്പിക്കുന്നുണ്ട്. നെഹ 13:31ൽ പരാമർശിച്ചിരിക്കുന്ന വിറക് വഴിപാടിൻറെ പെരുന്നാളാണിത്. (ഇപ്പോൾ ദേവാലയം ഇല്ലാത്തതിനാൽ യെഹൂദർ ഈ ദിവസം വലൻറൈൻസ് ഡേ പോലെ കമിതാക്കളുടെ ദിനമായി ആചരിക്കുന്നു.) ഈ പെരുന്നാൾ അവ് മാസം 15നാണ്. ചാന്ദ്രമാസം ഗ്രിഗോറിയൻ മാസത്തിൻറെ നടുവിലാണ് തുടങ്ങാറുള്ളത് എന്നതിനാൽ അവ് പതിനഞ്ചിന് ആചരിക്കുന്ന സൈലോഫോറി ജൂലൈ അവസാനത്തിൽ ആയിരിക്കും. യെഹൂദരുടെ കാര്യത്തിലുള്ള ദൈവത്തിൻറെ ഇടപെടലുകൾ പലതും അവ് മാസം 7, 9, 10 (ഏകദേശം ജൂലൈ 22, 24, 25) തിയ്യതികളിലാണ് നടന്നിട്ടുള്ളത് എന്നതിനാൽ ഹോമയാഗങ്ങൾ നിറുത്തപ്പെട്ടതും ഈ തിയ്യതികളിൽ ആയിരിക്കണം.

ശൂന്യമാക്കുന്ന മ്ലേച്ഛത സ്ഥാപിക്കപ്പെടുവാൻ 1290 ദിവസങ്ങൾ.

ക്രി.പി 66 ജൂലൈ മാസത്തിൻറെ ഒടുവിൽ  ഹോമയാഗങ്ങൾ നിറുത്തപ്പെട്ടതിനാൽ ആ മാസത്തിൻറെ ഒടുവിലെ ദിവസങ്ങൾ കണക്കാക്കാതെ, ആഗസ്ത് മാസത്തിൽ നിന്നും 1290 ദിവസങ്ങൾ (43 മാസങ്ങൾ) കണക്കാക്കിയാൽ ക്രി.പി.70ലെ ഫെബ്രുവരി കഴിഞ്ഞ് മാർച്ചിൻറെ ആരംഭത്തിൽ എത്തും. ക്രി.പി 70ലെ പെസഹയ്ക്ക് (ഏപ്രിൽ 14, എന്ന് പണ്ഡിതമതം) ഏതാനും ദിവസങ്ങൾക്ക് മുമ്പാണ് ടൈറ്റസ് സീസർ യെരൂശലേമിന് ഉപരോധം ഏർപ്പെടുത്തിയത്. ഈ തിയതിയിൽ നിന്നും 45 ദിവസം (1335 - 1290) കുറച്ചാലും മാർച്ചിൻറെ ആരംഭത്തിൽ എത്തും. (1335 ദിവസങ്ങളെ പറ്റി ചുവടെ എഴുതിയിട്ടുണ്ട്.)

ഈ കാലഘട്ടത്തിൽ നിരവധി മ്ലേച്ഛതകൾ നടന്നിരുന്നു. അവയിൽ ഏറ്റവും മ്ലേച്ഛമായത് എന്ന് ജോസഫസ് രേഖപ്പെടുത്തിയിരിക്കുന്ന ഒരു സംഭവം മാത്രം ഇവിടെ എഴുതുന്നു.

യെഹൂദരും റോമരും തമ്മിലുള്ള യുദ്ധം നടക്കുമ്പോൾ യുദ്ധം ചെയ്യുന്ന യെഹൂദരുടെ ഇടയിൽ മൂന്ന് സംഘങ്ങൾ ഉണ്ടായിരുന്നു: (“മഹാനഗരം 3 അംശമായി പിരിഞ്ഞു” എന്ന് വെളി 16:19.)

• ശിമയോൻറെ മകൻ എലെയാസറുടെ കീഴിൽ സീലട്ടുകൾ.
• ഗിസ്കാലയിൽ നിന്നുമുള്ള യോഹന്നാനും (John of Gischala - ഇവനാണ് പുതിയനിയമത്തിലെ പ്രധാന വില്ലന്മാരിൽ ഒരാൾ) അയാളുടെ സംഘവും.
• ശിമെയോൻ ബാർ ഗ്ലോറയും അയാളുടെ വലിയ സംഘവും.

ഇവർ പരസ്പരം കൊന്നൊടുക്കുകയും, നിരപരാധികളായ ജനങ്ങളെ ഉപദ്രവിക്കുകയും ചെയ്തുകൊണ്ടിരുന്നു. യെരൂശലേം നഗരത്തിന് വെളിയിൽ ഉണ്ടായിരുന്ന ടൈറ്റസ് സീസറും വെസ്പാസിയനും ഈ സംഘങ്ങൾ തമ്മിൽത്തല്ലി ചാകുവാൻ വേണ്ടി കാത്തുനിന്നു.

ഈ കാലത്തിൽ യോഹന്നാൻ ഗിസ്കാല ബലിപീഠത്തിൽ ബലിയർപ്പിച്ചുകൊണ്ടിരുന്ന പുരോഹിതന്മാരെ വേട്ടയാടിപ്പിടിക്കുവാൻ ഏദോമ്യരെ (ഹെരോദ്യരെ) പ്രേരിപ്പിച്ചു. (ജോസഫസ്, യെഹൂദരുടെ യുദ്ധങ്ങൾ 4:5:1, 2).

ഗിസ്കാലയാൽ പ്രേരിതരായ ഏദോമ്യർ ദേവാലയത്തിൻറെ പ്രാകാരത്തെ യെഹൂദരുടെ രക്തംകൊണ്ട് നിറച്ചു. ജനസമ്മതനും ജനക്ഷേമതൽപരനും, സമാധാനകാംഷിയും ആയിരുന്ന പുരോഹിതനായ അനന്യാസിനെയും യേശു എന്ന പേരുള്ള ഒരാളെയും കൊന്ന്, യെഹൂദരുടെ പാരമ്പര്യത്തിന് വിരുദ്ധമായി അവരുടെ ശവശരീരങ്ങൾ മറവുചെയ്യാതെ പൊതുസ്ഥലത്ത് അവശേഷിപ്പിച്ചു. (വെളിപ്പാട് 11ലെ രണ്ട് സാക്ഷികൾ?!)

നല്ലവരും ഹീനരുമായ എല്ലാത്തരം മനുഷ്യരുടെയും രക്തം പവിത്രമായ ബലിപീഠത്തിൽ വീഴ്ത്തി. (ജോസഫസ്, യെഹൂദരുടെ യുദ്ധങ്ങൾ 5:1:3) അന്തിയോക്കസ് എപ്പിഫാനസിൻറെ കാലത്ത് പന്നിയുടെ രക്തമാണ് ബലിപീഠത്തിൽ ചൊരിയപ്പെട്ടതെങ്കിൽ ഇക്കുറി അത് മനുഷ്യരക്തമാണ്.

ഈ സംഭവത്തെ പറ്റി വിവരിക്കുന്നിടത്ത് ജോസഫസ് യെരൂശലേമിനെ പറ്റി ഇങ്ങനെ പറയുന്നു: “ഇനിമുതൽ നീ ദൈവത്തിൻറെ സ്ഥലമായിരിക്കുവാൻ യോഗ്യയല്ല; സ്വന്തം ജനങ്ങളുടെ കല്ലറയായിത്തീർന്ന നിനക്ക് നിലനിൽക്കുവാൻ അർഹതയില്ല; നിന്നിലെ ആഭ്യന്തര യുദ്ധം, ഏറ്റവും പവിത്രമായ ആലയത്തെ ശ്മശാനമാക്കി മാറ്റിയിരിക്കുന്നു.” (ജോസഫസ്, യെഹൂദരുടെ യുദ്ധങ്ങൾ 5:1:3)

മനസ്സ് മരവിപ്പിക്കുന്നതും ഞെട്ടിപ്പിക്കുന്നതുമായ പല സംഭവങ്ങളും ആ കാലഘട്ടത്തിൽ നടന്നിട്ടുണ്ട്. അവയിൽ ഒന്നുപോലും അന്തിയോക്കസ് എപ്പിഫാനസിൻറെ പ്രവൃത്തിയേക്കാൾ നിന്ദ്യവും ഹീനവും മ്ലേച്ഛവുമായ ഈ പ്രവൃത്തിക്ക് തുല്യമല്ല.

1335 ദിനങ്ങൾ.

ദാനീ 12:11 1335 ദിവസത്തോളം കാത്തു ജീവിച്ചിരിക്കുന്നവൻ ഭാഗ്യവാൻ.

യെഹൂദയിൽ ആഭ്യന്തര കലഹങ്ങളും ചേരിപ്പോരും, ക്ഷാമങ്ങളും, ഭൂകമ്പങ്ങളും; യെരൂശലേമിനുള്ളിൽ കൊള്ളയും കൊലയും കൊള്ളിവെപ്പും, വെളിയിൽ ഉപരോധവുമായി ടൈറ്റസിൻറെ കീഴിൽ റോമൻ സൈന്യം. ഇതിനിടയിലാണ് “ഭാഗ്യവാൻ” പ്രത്യാശയോടെ കാത്തിരിക്കേണ്ടത്! എന്ത് പ്രത്യാശിക്കണം, എന്നല്ലേ? പ്രത്യാശിക്കുവാൻ വളരെയുണ്ട്.

യെരൂശലേമിനെ സൈന്യം വളയുന്നതിനെയും ഉപദ്രവത്തെയും പറ്റി പറഞ്ഞ ശേഷം യേശു പറഞ്ഞ വാക്കുകൾ ശ്രദ്ധിക്കുക:

ലൂക്കോ 21:27 അപ്പോൾ മനുഷ്യപുത്രൻ ശക്തിയോടും മഹാതേജസ്സോടും കൂടെ മേഘത്തിൽ വരുന്നത് അവർ കാണും.
ലൂക്കോ 21:28 ഇത് (ഇവയെല്ലാം) സംഭവിച്ച് തുടങ്ങുമ്പോൾ നിങ്ങളുടെ വീണ്ടെടുപ്പ് അടുത്തുവരുന്നതിനാൽ നിവർന്ന് തല പൊക്കുവിൻ
Luk 21:28 And when these things begin to come to pass, then look up, and lift up your heads; for your redemption draweth nigh

അതായത്, ഈ പറയപ്പെട്ട ഉപദ്രവങ്ങളും കലഹങ്ങളും സൈന്യവും, യെരൂശലേമിൻറെയും ദേവാലയത്തിൻറെയും നാശവുമെല്ലാം മനുഷ്യപുത്രൻറെ വരവിൻറെ പ്രത്യക്ഷതയാണ് . ഇവ കാണുമ്പോൾ യെരൂശലേമിലുള്ള വിശ്വാസികൾ അവരുടെ വീണ്ടെടുപ്പ് അടുത്തുവരുന്നു എന്ന് മനസ്സിലാക്കണം. അതാണ് അവരുടെ പ്രത്യാശ. അതിനായാണ് അവർ കാത്തിരിക്കേണ്ടത്. (യെരൂശലേം സൈന്യത്താൽ ചുറ്റപ്പെട്ടിരിക്കുന്നത് ഇന്ത്യയിലോ, ആഫ്രിക്കയിലോ ഒന്നാം നൂറ്റാണ്ടിൽ ജീവിച്ചിരുന്നവർ കാണുവാനോ അറിയുവാനോ വഴിയില്ലല്ലോ? അതായത്, ഇത് യെരൂശലേമിലും യെഹൂദയിലും മാത്രം ഉണ്ടായിരുന്നവർക്ക് ബാധകമായ കാര്യങ്ങളാണ്. ഇതൊക്കെ ഇപ്പോഴാണ് നടക്കുന്നതെങ്കിൽ നാം അറിഞ്ഞില്ലെന്നുവരും, കാരണം, നാം വാട്സാപ്പ്, ഫേസ്ബുക്ക്, ആംഗ്രി ബേഡ്സ്, കാൻഡി ക്രഷ് എന്നിവയുമായി തല കുനിച്ചാണല്ലോ ഇരുപ്പ്!)

“വീണ്ടെടുപ്പ്”

പയ്യന്നൂരിൽ നിന്നും ഞങ്ങളുടെ ഗ്രാമത്തിലൂടെ കടന്നുപോകുന്ന ലാസ്റ്റ് ബസ്സ് രാത്രി 9:30ന് പുറപ്പെടുമായിരുന്നു. അതിൽ കയറിപ്പറ്റുവാനുള്ള വ്യഗ്രതയിൽ പൊതുമര്യാദയും, മനുഷ്യത്വവും മറന്ന് ഉന്തും, തള്ളും, തെറിവിളിയും, ചവിട്ടും നടത്തുന്നത് കണ്ടിട്ടുണ്ട്.

ലൂക്കോ 21:28ൽ “വീണ്ടെടുപ്പ്” എന്ന വാക്ക് വായിക്കുമ്പോൾ അത് സ്വർഗത്തിലേയ്ക്കുള്ള ലാസ്റ്റ് ബസ്സ് പുറപ്പെടുന്നതിനെ പറ്റിയാണ് പരാമർശിക്കുന്നത് എന്ന് കരുതി സ്വയം വചനത്തിലേയ്ക്ക് കുത്തിക്കയറ്റുവാൻ ശ്രമിക്കുന്നവർ ഞാൻ പറയുന്നത് കേൾക്കേണ്ട, ഭവിഷ്യവാദികളും (futurist) വിഖ്യാതരുമായ വേദപണ്ഡിതന്മാർ പറയുന്നത് കേൾക്കൂ:

• ചാൾസ് എല്ലിക്കോട്ട്: “യെരൂശലേമിൻറെ നാശത്തെ തുടർന്ന് ക്രിസ്തുവിൻറെ സഭയ്ക്ക് യെഹുദരുടെ പീഡനത്തിൽ നിന്നും ലഭിച്ച വിമുക്തി.”
• ജാമിസൺ-ഫോസെറ്റ്-ബ്രൌൺ: “യെഹൂദ രാജ്യം ഇല്ലായതായതോടെ പുരോഹിത മേധാവിത്തത്തിൻറെ അടിച്ചമർത്തലിൽ നിന്നുമുള്ള വിമോചനം.”
• പുൾപിറ്റ് കമൻററി: “യെഹൂദ അധികാരികളുമായുള്ള കടുത്ത ശത്രുതയിൽ നിന്നുമുള്ള വിമോചനം.”

ഇത്രയും ലളിതമായ സംഭവത്തെ ആത്മീയവൽകരിച്ച്, ജനങ്ങൾക്ക് വ്യാമോഹങ്ങൾ വിൽക്കുകയായിരുന്നു ക്രൈസ്തവ മതം. ഇത്രയുമൊക്കെ വ്യക്തമായി എഴുതിയാലും മസ്തിഷ്കപ്രക്ഷാളനം ചെയ്യപ്പെട്ട മതവാദികൾ ലളിതമായ സത്യത്തെ അംഗീകരിക്കില്ല.

ഈ ലേഖനം ഒരു മഹാ സംഭവമാണെന്ന് അവകാശപ്പെടുന്നില്ല. കൂടുതൽ വിശദവും ഗഹനവുമായ പഠനം കൃത്യമായ തിയ്യതികൾ കണ്ടെത്തുവാൻ സഹായിച്ചേക്കും.

 ക്രിസ്തുവിൽ,
ടോംസാൻ കട്ടക്കൽ

“ശൂന്യമാക്കുന്ന മ്ലേച്ഛത”, ③ ഹീബ്രൂ കലണ്ടറും ജോസഫസും ഉയർത്തുന്ന പ്രശ്നങ്ങൾ.

ക്രിസ്തുവിൽ പ്രിയരെ,

ഇത് “ശൂന്യമാക്കുന്ന മ്ലേച്ഛത” എന്ന പരമ്പരയിലെ മൂന്നാമത്തെ ലേഖനമാണ്. ഒന്നും രണ്ടും ഭാഗങ്ങൾ വായിക്കാതെ ഈ ഭാഗം വായിച്ചിട്ട് പ്രയോജനമില്ല.

ശൂന്യമാക്കുന്ന മ്ലേച്ഛത സ്ഥാപിക്കപ്പെട്ട കാലം ഒന്നാം നൂറ്റാണ്ടിൽ ദേവാലയം തകർക്കപ്പെടുന്നതിന് മുമ്പായിരുന്നു എന്ന് സ്ഥാപിക്കുവാനാണ് എൻറെ ശ്രമം എന്ന് മനസ്സിലായിരിക്കുമല്ലോ?

3½ വർഷങ്ങൾ.

പ്രാചീന ഹീബ്രൂ ഭാഷയിൽ ഭിന്നസംഖ്യകൾ അവതരിപ്പിക്കുവാനുള്ള സംവിധാനം ഇല്ലാതിരുന്നത് അവിശ്വാസികൾക്ക് വേദപുസ്തകത്തെ അവഹേളിക്കുവാനുള്ള അവസരം നൽകി.

1രാജാ 7:26 അവൻ ഒരു കടൽ വാർത്തുണ്ടാക്കി; അത് വൃത്താകാരം ആയിരുന്നു; അതിന് വക്കോട് വക്ക് (വ്യാസം) 10 മുഴവും ഉയരം 5 മുഴവും ചുറ്റും (ചുറ്റളവ്‌) 30 മുഴം നൂൽ അളവും ഉണ്ടായിരുന്നു.

10 മുഴം വ്യാസമുള്ള വൃത്തത്തിന് πd (പൈ X വ്യാസം) എന്ന സമവാക്യമനുസരിച്ച് 31.41 മുഴം ചുറ്റളവ് വേണ്ടേ എന്നാണ് അവരുടെ ചോദ്യം. പൈ അറിയാത്ത നമ്മുടെ ആശാരിമാർ എങ്ങനെയാണ് വട്ടത്തിലുള്ള കിണറുകളും തൂണുകളും, കെട്ടിടങ്ങളും ഉണ്ടാക്കിയിരുന്നത് എന്നത് അവിശ്വാസികളുടെ വിഷയമല്ലല്ലോ?

വെളിപ്പാട് പുസ്തകത്തിൽ ഒരേ കാലയളവിനെ “ഒരു കാലവും ഇരു കാലവും അരക്കാലവും”, 42 മാസങ്ങൾ, 1260 ദിവസങ്ങൾ എന്നിങ്ങനെ വിവിധ രീതികളിൽ അവതരിപ്പിച്ചിട്ടുണ്ട് എന്നത് സത്യമായിരിക്കേ, ദാനീ 12:7ൽ “കാലവും കാലങ്ങളും കാലാർദ്ധവും” എന്ന് എഴുതിയിരിക്കുന്നത് കൃത്യം 3½ വർഷങ്ങൾ ആയിക്കൊള്ളണമെന്നില്ല. കാരണം: അര (അർദ്ധം) എന്ന് പരിഭാഷപ്പെടുത്തിയിരിക്കുന്ന ഹീബ്രൂ വാക്കിന് (സ്ട്രോങ്സ് നിഘണ്ടുവിൽ H2677) ഇടയിൽ, നടുവിൽ, അർദ്ധരാത്രി, ഭാഗം, അംശം എന്നൊക്കെ അർത്ഥമുണ്ട്. (യെശ 44:16, 19 വചനങ്ങൾ കാണുക.)

അതായത്, ദാനീ 12:7ൽ “കാലവും കാലങ്ങളും കാലാർദ്ധവും” എന്ന് എഴുതിയിരിക്കുന്നതിന് കാലം (വർഷം) + കാലങ്ങൾ (2 വർഷങ്ങൾ) + ഒരു വർഷത്തിൻറെ അംശം എന്ന് അർത്ഥമാകാം. 3½ വർഷങ്ങൾ എന്നത് ഒരു വർഷത്തിൽ 360 ദിവസങ്ങൾ ഉള്ള കലണ്ടറിൽ 1260 ദിവസങ്ങളാണ്. ദാനീ 12:11, 12 വചനങ്ങളിലെ 1290, 1335 ദിവസങ്ങൾ എന്നിവ യഥാക്രമം 3 വർഷം 7 മാസവും, 3 വർഷം 8½ മാസവുമാണ്. നമ്മളുടെ നാടൻ ഭാഷയിൽ പറഞ്ഞാൽ മൂന്നിൽ ചില്വാനം വർഷങ്ങൾ. കൃത്യം 3½ വർഷങ്ങൾ ആയിക്കൊള്ളണമെന്നില്ല എന്ന് അർത്ഥം.

ഹീബ്രൂ കലണ്ടറും ജോസഫസും ഉയർത്തുന്ന പ്രശ്നങ്ങൾ.

നാലാം നൂറ്റാണ്ടിന് മുമ്പ് ഉണ്ടായിരുന്ന ഹീബ്രൂ കലണ്ടർ ഒരുതരം തമാശയായിരുന്നു. 29, 30, 29, 30 എന്ന ക്രമത്തിൽ 12 മാസങ്ങളും 354 ദിവസങ്ങളും ഉള്ള ഹീബ്രൂ ചാന്ദ്ര വർഷം സൌര വർഷത്തേക്കാൾ 11 ദിവസം കുറവായിരുന്നതിനാൽ 3 വർഷം കൂടുമ്പോൾ 33 ദിവസത്തിൻറെ വ്യത്യാസം വരും. അപ്പോൾ പുരോഹിതന്മാർ ബാർലിയുടെ വിളവ് (ആബീബ് മാസത്തിൻറെ പേരിൻറെ അർത്ഥം ബാർലിയുടെ കതിര് എന്നാണ്), മരങ്ങളിലെ ഫലങ്ങൾ, ഉത്തര/ദക്ഷിണായനങ്ങൾ എന്നിവ പരിശോധിച്ച് പന്ത്രണ്ടാം മാസമായ ആദാർ മാസത്തെ ആദാർ 2 എന്ന് ആക്കിയിട്ട് അതിന് മുമ്പ് ആദാർ എന്നൊരു മാസം ചേർക്കും. എന്നിട്ടും ബാക്കിയുള്ള 3 ദിവസങ്ങളിൽ 2 എണ്ണം ഓരോ മാസത്തിന് ചാർത്തിക്കൊടുക്കും. (ബാക്കിയുള്ള ഒരു ദിവസം എന്തെടുക്കുമോ, ആവോ?!) യുദ്ധങ്ങളോ, ആഭ്യന്തര പ്രശ്നങ്ങളോ ഉള്ള വർഷങ്ങളിൽ ഇതൊന്നും നടത്തില്ല. (ആർക്കെങ്കിലും സ്വന്തം വയസ്സ് കൃത്യമായി അറിയണമെങ്കിൽ ഒരു പാട്ടയിൽ ദിവസേന ഒരോ ചക്കക്കുരു ഇട്ടുവെച്ചിട്ട് എണ്ണിനോക്കണമായിരുന്നു എന്ന് സാരം.)

[354 ദിവസങ്ങളുള്ള ചാന്ദ്രമാസങ്ങളുള്ള കലണ്ടറുകൾ ഉപയോഗിക്കുമ്പോൾ 19 വർഷങ്ങളുടെ ഒരു ആവൃത്തിയിൽ (cycle) 7 തവണ അധികമാസങ്ങൾ ഉണ്ടാകും എന്ന് പൊതുവിജ്ഞാനത്തിനായി പറഞ്ഞുവെക്കുന്നു.]

ഫ്ലേവിയസ് ജോസഫസ് ഉൽപത്തി മുതൽ യെഹൂദരുടെ നാശം വരെയുള്ള കാര്യങ്ങൾ വളരെ വിശദമായി എഴുതിയിരുന്നു. അദ്ദേഹത്തിൻറെ സമ്പൂർണ കൃതികൾ വേദപുസ്തകത്തിൻറെ ഇരട്ടിയിൽ അധികം വലിപ്പം വരും. വേദപുസ്തകത്തിലുള്ള പല കാര്യങ്ങളുടെയും വിശദാംശങ്ങൾ അദ്ദേഹം എഴുതിയിട്ടുണ്ട്. ഒന്നാം നൂറ്റാണ്ടിലെ ഏറ്റവും വിശ്വാസയോഗ്യരായ ചരിത്രകാരന്മാരിൽ ഒരാളാണ് അദ്ദേഹം.

പക്ഷേ, ചരിത്രകാരന് വേണ്ട ഏറ്റവും പ്രധാപ്പെട്ട കാര്യം തിയ്യതികളാണെന്ന് ജോസഫസ് മറന്നുപോയിരിക്കാം. അദ്ദേഹത്തിൻറെ കൃതികളിൽ തിയ്യതികളെ പറ്റിയുള്ള പരാമർശം കുറവാണ്. ഇനി അഥവാ എവിടെയെങ്കിലും തിയ്യതികൾ നൽകപ്പെട്ടിട്ടുണ്ടെങ്കിലും അവ മുകളിൽ വിവരിച്ചത് പോലെയുള്ള തിയ്യതികൾ ആയിരിക്കും.

എൻറെ അമ്മ ജനിച്ചത് 1934 ഏപ്രിൽ 30ന് ആയിരുന്നു. ഇത് മലയാളം കലണ്ടറിൽ 1109 മേടം 17. ഈ തിയ്യതിയെ പറ്റി ഞാൻ നിങ്ങളോട് 1934 മേടം 17 എന്നോ, 1109 ഏപ്രിൽ 30 എന്നോ പറഞ്ഞാൽ എങ്ങനിരിക്കും? ജോസഫസ് പലേടത്തും ഗ്രീക്ക്, റോമൻ, ഹീബ്രൂ തിയ്യതികൾ ഇത്തരത്തിൽ കൂട്ടിക്കുഴച്ചിട്ടുണ്ടെന്ന് പണ്ഡിതന്മാർ കരുതുന്നു.

ഇങ്ങനെയുള്ള വിവിധ കാരണങ്ങളാൽ അന്തിയോക്കസ് എപ്പിഫാനസിൻറെ കാലത്തെ സംഭവങ്ങളെ നമ്മൾ കണക്കുകൂട്ടിയ അത്രയും ലളിതമായി ഒന്നാം നൂറ്റാണ്ടിൽ നടന്ന സംഭവങ്ങളുടെ ഇടയിലുള്ള കാലം കണക്കുകൂട്ടുവാൻ കഴിയില്ല.

സംഭവബഹുലമായ കാലം.

വേദപുസ്തകം ശ്രദ്ധാപൂർവം പഠിച്ചിട്ടുള്ളവർക്ക്‍ ഏതാനും ദിവസങ്ങൾ ചെലവഴിച്ചാൽ ആദാം മുതൽ യേശു വരെ ഉള്ളവരുടെ വംശവൃക്ഷം (family tree) ഉണ്ടാക്കിയെടുക്കാം. അതേ സമയം മഹാഭാരതത്തിൽ വളരെയധികം കഥാപാത്രങ്ങളും സങ്കീർണമായ ബന്ധങ്ങളും ഉള്ളതുകൊണ്ട് അത്തരം ഒരു ഉദ്യമം പ്രായേണ ശ്രമകരമാണ്. ലോകത്തിൽ ആദ്യമായി മഹാഭാരതത്തിൻറെ വംശവൃക്ഷം തയ്യാറാക്കിയത് ശ്രീ വെട്ടം മാണിയാണ്. അതിനായി അദ്ദേഹം 10-12 വർഷങ്ങൾ ചെലവഴിക്കേണ്ടിവന്നു.

മഹാഭാരതത്തിലെ അത്രയും കഥാപാത്രങ്ങൾ 7-8 വർഷക്കാലത്തിനുള്ളിൽ ചേരിതിരിഞ്ഞ് ഉപജാപങ്ങളും, ഗൂഡാലോചനകളും, വഴക്കുകളും, യുദ്ധങ്ങളും നടത്തുകയും, ശത്രുക്കളെ സൃഷ്ടിക്കുകയും, സംഹരിക്കുകയും, സംഹരിക്കപ്പെടുകയും, പ്രകൃതിക്ഷോഭങ്ങൾക്കും ദൈവകോപത്തിനും വിധേയരാകുകയും ചെയ്താൽ എങ്ങനെയുണ്ടാകും? ഏകദേശം അതുപോലെയായിരുന്നു ക്രി.പി 66 മുതൽ 70 വരെയുള്ള കാലഘട്ടത്തിൽ യെരൂശലേമിലും യെഹൂദയിലും നടന്നിരുന്ന സംഭവങ്ങൾ.

രണ്ട് തവണ ബലികൾ നിറുത്തിവെക്കപ്പെട്ടു, പലരും പലതരത്തിലുള്ള വിഗ്രഹങ്ങളും ചിഹ്നങ്ങളും സ്ഥാപിച്ചു, പലതരത്തിലുള്ള മ്ലേച്ഛതകൾ പ്രവർത്തിച്ചു.

യെഹൂദർക്കും റോമർക്കും ഇടയിൽ ഉണ്ടായ ഒന്നാം യുദ്ധം ഏകദേശം 7 വർഷങ്ങളോളം നീണ്ടുനിന്നു - ക്രി.പി. 66 മുതൽ 73-74 വരെ. യുദ്ധത്തിൻറെ പ്രധാന ഭാഗം നടന്നത് യെരൂശലേം നശിപ്പിക്കപ്പെട്ട ക്രി. പി. 70ന് മുമ്പുള്ള നാലിൽ താഴെ (മൂന്നിൽ ചില്വാനം) വർഷങ്ങളിലാണ്. ആ കാലഘട്ടത്തിൽ നടന്ന ചില സുപ്രധാന സംഭവങ്ങളാണ് അടുത്ത ലേഖനത്തിൽ അവതരിപ്പിക്കുന്നത്.

അടുത്ത ലേഖനത്തോടെ ഈ പരമ്പര അവസാനിക്കും.

ക്രിസ്തുവിൽ,

ടോംസാൻ കട്ടക്കൽ

“ശൂന്യമാക്കുന്ന മ്ലേച്ഛത” - യേശു ഉദ്ദേശിച്ചത്.

ക്രിസ്തുവിൽ പ്രിയരെ,

ഇത് “ശൂന്യമാക്കുന്ന മ്ലേച്ഛത” എന്ന പരമ്പരയുടെ രണ്ടാം ഭാഗമാണ്. ഒന്നാം ഭാഗം വായിക്കാതെ ഈ ഭാഗം വായിച്ചിട്ട് പ്രയോജനമില്ല.

അന്തിയോക്കസ് എപ്പിഫാനസിൻറെ കാലത്ത് ശൂന്യമാക്കുന്ന മ്ലേച്ഛത സ്ഥാപിക്കപ്പെട്ട ശേഷം ഒരു നിർദ്ദിഷ്ട കാലയളവിൽ ദേവാലയവും ബലികളും പുനഃസ്ഥാപിക്കപ്പെടും എന്ന പ്രവചനം ഉണ്ടായിരുന്നെന്നും അത് കൃത്യമായി നിറവേറിയെന്നും നാം ഒന്നാം ഭാഗത്തിൽ കണ്ടു.

ശൂന്യമാക്കുന്ന മ്ലേച്ഛത സ്ഥാപിക്കപ്പെടുന്നതും വിവിധ തരം ബലികൾ നിറുത്തലാക്കപ്പെടുന്നതുമായി അഭേദ്യമായി ബന്ധപ്പെട്ടിരിക്കുന്നു എന്നും നമ്മൾ കണ്ടു.

ഹോമയാഗവും ഹനനയാഗവും കഴിഞ്ഞ 1950ൽ പരം വർഷങ്ങളായി നടക്കുന്നില്ല. അതുകൊണ്ടുതന്നെ ഈ വചനങ്ങൾ നമ്മുടെ കാലത്തോ ഭാവിയിലോ നിറവേറേണ്ടതാണ് എന്ന വാദം നിരർത്ഥകമാണ്.

യെഹെസ്കേലിൻറെ ദർശനത്തിന് ആരോ നൽകിയ വ്യാഖ്യാനത്തിൻറെ അടിസ്ഥാനത്തിൽ യെരൂശലേമിൽ ദേവാലയം വീണ്ടും നിർമ്മിക്കപ്പെടുമെന്നും ബലികൾ പുനഃസ്ഥാപിച്ച ശേഷം വീണ്ടും ശൂന്യമാക്കുന്ന മ്ലേച്ഛത സ്ഥാപിക്കപ്പെടും എന്ന് വാദിക്കുന്നത് നിരർത്ഥകമാണ്. കാരണം നമ്മളാണ് ദൈവത്തിൻറെ ആലയം, നമ്മുടെ ജീവിതമാണ് ദൈവത്തിന് സ്വീകാര്യമായ ബലികൾ. യേശുവിൻറെ ഒരേയൊരു ബലിയാൽ നിർമ്മാർജനം ചെയ്യപ്പെട്ട മൃഗബലികൾ പുനഃസ്ഥാപിക്കപ്പെടും എന്ന് വാദിക്കുന്നവരും തങ്ങൾ ക്രൈസ്തവരാണ് എന്ന് അവകാശപ്പെടുന്നതാണ് വിചിത്രം.

മത്താ 24:15ൽ യേശു പരാമർശിച്ചത് ദാനീ 9:27; 12:11.

മുമ്പ് നാം പരിശോധിച്ച വചനങ്ങളിൽ നിന്നും വിഭിന്നമായി, ഈ വചനങ്ങൾക്ക് യേശുവുമായി നേരിട്ടുള്ള ബന്ധമുണ്ട്. 

• ദാനീ 9:27ൻറെ സന്ദർഭം മിശിഹായെ പറ്റി പരാമർശിക്കുന്നതാണ്. (ദാനീ 9:26) 
• ദാനീ 12:11ൻറെ സന്ദർഭമാകട്ടെ പുനരുത്ഥാനത്തെയും ന്യായവിധിയെയും പരാമർശിക്കുന്നതാണ്. (ദാനീ 12:1-3; 13).

ദാനീ 9:27 അവൻ ഒരു ആഴ്ചവട്ടത്തേക്ക് പലരോടും നിയമത്തെ കഠിനമാക്കും; ആഴ്ചവട്ടത്തിൻറെ മദ്ധ്യേ അവൻ ഹനനയാഗവും ഭോജനയാഗവും നിറുത്തലാക്കിക്കും; മ്ലേച്ഛതകളുടെ ചിറകിന്മേൽ ശൂന്യമാക്കുന്നവൻ വരും; നിർണയിക്കപ്പെട്ടിരിക്കുന്ന സമാപ്തി വരെ ശൂന്യമാക്കുന്നവൻറെ (ശൂന്യതയുടെ) മേൽ കോപം ചൊരിയും.
Dan 9:27 And he shall confirm the covenant with many for one week: and in the midst of the week he shall cause the sacrifice and the oblation to cease, and for the overspreading of abominations he shall make it desolate, even until the consummation, and that determined shall be poured upon the desolate.

[ഈ വേദഭാഗത്തിൻറെ സങ്കീർണ്ണതയ്ക്ക് പുറമേ മലയാളം പരിഭാഷകൻറെ ഭാവനാവിലാസവും കൂടെ ആയപ്പോൾ ഭേഷായി!]

ശൂന്യമാക്കുന്നതിന് പുറമേ, ശൂന്യമായിത്തീർന്നതിൻറെ മേൽ വീണ്ടും കോപം ചൊരിയും - നിർണയിക്കപ്പെട്ടിരിക്കുന്ന അന്ത്യം വരെ. അതായത്, ഒരു പുനഃസ്ഥാപനത്തിനുള്ള സാധ്യതയേ ഇല്ല.

ദാനീ 12:11 നിരന്തര ഹോമയാഗം നിറുത്തലാക്കുകയും ശൂന്യമാക്കുന്ന മ്ലേച്ഛബിംബത്തെ പ്രതിഷ്ഠിക്കുകയും ചെയ്യുന്ന കാലം മുതൽ 1290 ദിവസം ചെല്ലും.

ഈ വചനത്തിന് മുമ്പ് ഇത് നടക്കേണ്ട കാലം സ്പഷ്ടമാക്കിയിട്ടുണ്ട്:

ദാനീ 12:7 ... വിശുദ്ധ ജനത്തിൻറെ ബലത്തെ തകർത്തുകളഞ്ഞ ശേഷം ഈ കാര്യങ്ങൾ എല്ലാം നിവൃത്തിയാകും ...

വിശുദ്ധ ജനത്തിൻറെ (യിസ്രായേലിൻറെ) ബലം തകർക്കപ്പെട്ടത് ക്രി.പി. 70ൽ. ആ സമയത്താണ് ദാനീയേൽ ഏറ്റവും ഒടുവിൽ എഴുതിയതും, യേശു പരാമർശിച്ചതുമായ ശൂന്യമാക്കുന്ന മ്ലേച്ഛത പ്രതിഷ്ടിക്കപ്പെടേണ്ടിയിരുന്നത്. അതായത്, ദാനീ 12:11ൽ പരാമർശിക്കപ്പെട്ടിരിക്കുന്ന ശൂന്യമാക്കലിന് ശേഷം പുനഃസ്ഥാപനത്തിന് സാധ്യതയില്ല.

ശൂന്യമാക്കുന്ന മ്ലേച്ഛത സ്ഥാപിക്കപ്പെടുന്നതും വിവിധതരം യാഗങ്ങൾ നിർത്തലാക്കപ്പെടുന്നതുമായി ബന്ധപ്പെട്ടിരിക്കുന്നത് ശ്രദ്ധിക്കുക. നിരന്തര ഹോമയാഗങ്ങളും, ഹനനയാഗങ്ങളും, ഭോജനയാഗങ്ങളുമായി യെഹൂദർക്കും, യെരൂശലേമിനുമല്ലാതെ ക്രൈസ്തവർക്കോ വത്തിക്കാനോ ബന്ധമുണ്ടോ? ആലോചിച്ചു നോക്കൂ, സഹോദരാ, സഹോദരീ!

അന്തിയോക്കസ് എപ്പിഫാനസിൻറെ കാലത്ത് എതിർത്തുനിൽക്കുവാനും ചെറുത്ത് തോൽപിക്കുവാനും ദൈവത്തോട് വിധേയത്വം പുലർത്തിയിരുന്നവരും ദൈവത്തിൻറെ ആനുകൂല്യത്തിന് പാത്രരുമായ മക്കബായ സഹോദരന്മാർ ഉണ്ടായിരുന്നു. ക്രി.പി.70ൽ യെരൂശലേം ദേവാലയം നശിപ്പിക്കുവാൻ റോമൻ സൈന്യത്തേക്കാൾ അധികം കാരണക്കാരായത് യെഹൂദരായ സീലട്ടുകളും [Zealots], ഹെരോദ്യരുമാണ്. അവരെല്ലാം റോമരുമായുള്ള ഏറ്റുമുട്ടലിൽ കൊല്ലപ്പെട്ടു.

“മ്ലേച്ഛബിംബം”

മലയാളം പരിഭാഷയിൽ മാത്രമാണ് ഈ പദപ്രയോഗം ഉള്ളതെങ്കിലും അത് വളരെ പ്രസക്തമാണ്. (ഇതര പരിഭാഷകളിൽ മ്ലേച്ഛത - abomination - എന്ന് മാത്രമേയുള്ളൂ.)

അന്തിയോക്കസ് എപ്പിഫാനസ് ദേവാലയത്തിലും യെരൂശലേം നഗരത്തിലും സിയൂസിൻറെ പ്രതിമയാണ് സ്ഥാപിച്ചതെങ്കിൽ, റോമൻ സൈന്യം ദേവാലയത്തിൻറെ കിഴക്കേ കവാടത്തിലും നഗരത്തിൻറെ വിവിധ ഭാഗങ്ങളിലും ജൂപ്പിറ്ററിൻറെയും സീയൂസ്സിൻറെയും അവരുടെ ദേവതയായ അക്വില്ലയുടെയും പ്രതിമകളും ചിഹ്നങ്ങളും കൊണ്ട് നിറച്ചു.

അടുത്ത ലേഖനത്തിൽ തുടരും...

ക്രിസ്തുവിൽ,

ടോംസാൻ കട്ടക്കൽ

“ശൂന്യമാക്കുന്ന മ്ലേച്ഛത” - യേശു മനസ്സാ വാചാ കർമ്മണാ ഉദ്ദേശിക്കാത്തത്.

ക്രിസ്തുവിൽ പ്രിയരെ,

ശൂന്യമാക്കുന്ന മ്ലേച്ഛതയെ പറ്റിയുള്ള ഈ പരമ്പര തയ്യാറാക്കുമ്പോൾ എൻറെ മനസ്സിൽ വ്യക്തതയുള്ള ചില കാര്യങ്ങളുണ്ട്.

• ഞാൻ ചരിത്ര വിദ്യാർത്ഥിയല്ല. അതുകൊണ്ടുതന്നെ ചില പിഴവുകൾ സംഭവിക്കാം.
• എൻറെ വായനക്കാർ എന്നെക്കാൾ ബുദ്ധിമാന്മാരും, ഉത്സാഹശാലികളുമാണ്. ഞാൻ എഴുതിയതിനേക്കാൾ അധികം വ്യക്തതയോടെ എഴുതുവാൻ അവർക്ക് കഴിയും.
• ഈ വിഷയത്തെ പറ്റി ഇവിടെ അവതരിപ്പിച്ചിരിക്കുന്ന വീക്ഷണകോണിൽ നിന്നുമുള്ള എഴുത്തുകൾ മലയാളത്തിൽ ഉണ്ടായിട്ടില്ല (ചില അംശങ്ങൾ വേറെ എവിടെയും കണ്ടില്ലെന്നുവരാം). അതുകൊണ്ടുതന്നെ കൂടുതൽ വിശദമായ പഠനങ്ങൾ ഉണ്ടാകേണ്ടിയിരിക്കുന്നു.
• ഏതെങ്കിലും മതത്തെയോ, മതവിഭാഗത്തെയോ ശൂന്യമാക്കുന്ന മ്ലേച്ഛതയായി ചിത്രീകരിച്ച് പഠിച്ചവർക്ക് ഈ ലേഖനങ്ങൾ അത്ര പിടിച്ചെന്ന് വരില്ല.
• എൻറെ അപ്പൻ വി. ഓ. സ്കറിയാ കത്തോലിക്കനായതിനാലാണ് ഞാൻ ഇങ്ങനെ എഴുതുന്നത് എന്ന് കരുതുന്നവരുടെ ബുദ്ധിമാന്ദ്യം മാറുവാൻ സമയം കിട്ടുമ്പോൾ പ്രാർത്ഥിക്കാം.
• ഈ പരമ്പര എഴുതുവാൻ ഒരു മാസം സമയമെടുത്തു. ഇത് ഇതിലധികം ലളിതവും സംക്ഷിപ്തവുമാക്കുവാൻ എന്നാൽ കഴിയില്ല.

ശൂന്യമാക്കുന്ന മ്ലേച്ഛതയെ പറ്റി വേദപുസ്തകത്തിൽ ആധാരമില്ലാത്ത ധാരാളം നിഗമനങ്ങളുണ്ട്. അതിൽ ഏറ്റവും പ്രചുരപ്രചാരം സിദ്ധിച്ച ഒന്നാണ് റോമൻ കത്തോലിക്കാ സഭയും മാർപ്പാപ്പയുമാണ് ശൂന്യമാക്കുന്ന മ്ലേച്ഛത എന്നത്. വേറെ ചിലർ കത്തോലിക്കർ കർത്തൃമേശയിൽ ഉപയോഗിക്കുന്ന ഓസ്തിയാണ് (അപ്പം) ശൂന്യമാക്കുന്ന മ്ലേച്ഛത എന്ന് കണ്ടുപിടിച്ചു.

വേദപുസ്തകം ഈ വിഷയത്തിൽ എന്ത് പറയുന്നു എന്ന് പരിശോധിക്കാം:

മത്താ 24:15 എന്നാൽ ദാനീയേൽ പ്രവാചകൻ മുഖാന്തരം അരുളിച്ചെയ്തത് പോലെ ശൂന്യമാക്കുന്ന മ്ലേച്ഛത വിശുദ്ധസ്ഥലത്തിൽ നിൽക്കുന്നത് നിങ്ങൾ കാണുമ്പോൾ (വായിക്കുന്നവൻ ചിന്തിച്ചു കൊള്ളട്ടെ),
Mat 24:15 When ye therefore shall see the abomination of desolation, spoken of by Daniel the prophet, stand in the holy place, (whoso readeth, let him understand:)
മത്താ 24:16 അന്ന് യെഹൂദ്യയിൽ ഉള്ളവർ മലകളിലേക്ക് ഓടിപ്പോകട്ടെ.
Mat 24:16 hen let them which be in Judaea flee into the mountains:

ഈ വേദഭാഗത്ത് മാർപ്പാപ്പയെ ആരോപിച്ചാൽ എങ്ങനെയിരിക്കും?

മാർപ്പാപ്പ അങ്ങേരുടെ (ദുർ)ഭരണം ലോകം മുഴുവൻ നടത്തുന്നതും അങ്ങേർ വത്തിക്കാനിൽ അങ്ങേരുടെ സിംഹാസനത്തിൽ ഇരിക്കുന്നതും കാണുമ്പോൾ, യെഹൂദ്യയിലുള്ളവർ മലകളിലേയ്ക്ക് ഓടണം പോലും! ഏകദേശം എറണാകുളം ജില്ലയുടെ അത്രയും മാത്രം വിസ്തീർണ്ണമുള്ള യെഹൂദ്യയിലുള്ളവർ മലകളിലേയ്ക്ക് ഓടുമെന്ന് കരുതുക. ബാക്കി വിശാലമായ ലോകത്തിലുള്ള കോടിക്കണക്കിന് മനുഷ്യർ എന്തുചെയ്യും?യെഹൂദ്യയിൽ നിന്നും 4070 കിലോമീറ്റർ ദൂരത്തിലുള്ള വത്തിക്കാനിൽ മാർപ്പാപ്പ എന്തോ ചെയ്യുന്നതിന് യെഹൂദ്യയിലുള്ളവർ എന്തിന് ഓടണം?

മാർപ്പാപ്പയുടെ ഭരണം തുടങ്ങിയത് നിഖ്യാ സുന്നഹദോസിന് (Nicaea Council) ശേഷമാണെന്ന് ചരിത്രം സാക്ഷ്യപ്പടുത്തുന്നു. അതായത്, ഏകദേശം 1700 വർഷങ്ങളായി മാർപ്പാപ്പ ഭരണം തുടങ്ങിയിട്ട്. ഇക്കാലമത്രയും യെഹൂദ്യയിലുള്ളവർ മലകളിലേയ്ക്ക് ഓടുകയായിരുന്നോ? മിസ്സൈലുകളും, ബോംബുകളും, ഡ്രോണുകളും ഉള്ള ഈ കാലത്ത് മലകളിലേയ്ക്ക് ഓടിയിട്ട് എന്താണ് പ്രയോജനം?

പലരും ഈ വചനത്തെ പല തരത്തിൽ ആത്മീയവൽക്കരിക്കാറുണ്ട്. അവയെല്ലാം പരിശോധിച്ച് എൻറെയും നിങ്ങളുടെയും സമയം പാഴാക്കുന്നില്ല.

ദാനീയേൽ 8, 11 അദ്ധ്യായങ്ങളിലെ “ശൂന്യമാക്കുന്ന മ്ലേച്ഛത”

ചിലർ ഭക്ഷണം കഴിക്കുന്നത് കണ്ടാൽ ചർദ്ദിൽ വരും. കൈപ്പത്തി മുഴുവൻ പാത്രത്തിൽ ഇറക്കി, വിഭവങ്ങളെല്ലാം കൂടെ അളിച്ച്, വാരി വായിൽ നിറച്ച്, ഉച്ചത്തിൽ ശബ്ദം കേൾപ്പിച്ച് ചവച്ച് വിഴുങ്ങുന്നത് കാണുമ്പോൾ ഇറങ്ങിയോടുവാൻ തോന്നും. ഇതുപോലെയാണ് ചിലരുടെ വേദപഠനവും. പ്രസക്തവും അപ്രസക്തവുമായ വേദഭാഗങ്ങളെല്ലാം കൂടെ കൂട്ടിക്കുഴച്ച് ഒരു തട്ടലാണ്.

ദാനീയേലിൻറെ പ്രവചനത്തിൽ മൂന്ന് തവണ (ദാനീ 9:27; 11:31; 12:11) ശൂന്യമാക്കുന്ന മ്ലേച്ഛതയെ പറ്റി പരാമർശിക്കപ്പെട്ടിട്ടുണ്ട്. അതെല്ലാം കൂടെ കൂട്ടിക്കുഴച്ച് സ്വയം വിഴുങ്ങുന്നതും കൂടാതെ മറ്റുള്ളവരുടെ തൊണ്ടയിൽ കുത്തിയിറക്കുവാൻ ശ്രമിക്കുന്നതാണ് കഷ്ടം.

ദാനീ 11:31 അവൻ അയച്ച സൈന്യങ്ങൾ അണിനിരന്ന്, വിശുദ്ധ മന്ദിരമായ കോട്ടയെ അശുദ്ധമാക്കി, നിരന്തര ഹോമം നിറുത്തൽചെയ്ത്, ശൂന്യമാക്കുന്ന മ്ലേച്ഛബിംബത്തെ പ്രതിഷ്ഠിക്കും.

മത്താ 24:15ൽ യേശു പരാമർശിക്കുന്നത് ദാനീ 11:31ലെ ശൂന്യമാക്കുന്ന മ്ലേച്ഛതയെ പറ്റിയല്ല, കാരണം, ദാനീയേൽ 11 പ്രാചീന പാർസി (പേർഷ്യ), യവന (ഗ്രീക്ക്) രാജ്യങ്ങളെ പറ്റിയുള്ള പ്രവചനമാണ്. ആ രാജ്യങ്ങൾ യേശുവിൻറെ കാലത്തിന് മുമ്പുതന്നെ ഇല്ലാതായി.

ദാനീ 11:2 ഇപ്പോഴോ, ഞാൻ നിന്നോട് സത്യം അറിയിക്കാം പാർസി ദേശത്ത് ഇനി 3 രാജാക്കന്മാർ എഴുനേൽക്കും; നാലാമൻ എല്ലാവരിലും അധികം ധനവാനായിരിക്കും; അവൻ ധനത്താൽ ശക്തിപ്പെട്ടുവരുമ്പോൾ എല്ലാവരെയും യവന രാജ്യത്തിന് നേരെ നിയമിക്കും.

മഹാനായ അലക്സന്തരിൻറെ കാലശേഷം മാസിഡോണിയ (യവന അല്ലെങ്കിൽ ഗ്രീക്ക് രാജ്യം) 4 ഭാഗങ്ങളായി പിരിഞ്ഞപ്പോൾ യിസ്രായേൽ അവയിൽ ഒന്നായ സെല്യൂസീഡ് രാജ്യത്തിൻറെ ഭാഗമായി മാറി. സെല്യൂസീഡ് രാജാക്കന്മാരിൽ ഒരാളായ അന്തിയോക്കസ് എപ്പിഫാനസ് യെരൂശലേമിൽ അനവധി വിഗ്രഹങ്ങൾ സ്ഥാപിക്കുകയും, നിരന്തര ഹോമയാഗം നിറുത്തലാക്കുകയും ദേവാലയത്തിലെ ബലിപീഠത്തിൽ പന്നിയിറച്ചി ബലികഴിക്കുകയും ചെയ്തു. അന്തിയോക്കസിൻറെ ക്രൂരതകളെ പറ്റിയുള്ള പ്രവചനം ദാനീയേൽ 8ലും, അവയുടെ പൂർത്തീകരണം കത്തോലിക്കരുടെ വേദപുസ്തകത്തിലെ മക്കബായരുടെ പുസ്തകങ്ങളിലും കാണാം.

2300 സന്ധ്യയും ഉഷസ്സും = 1150 ദിവസങ്ങൾ

അന്തിയോക്കസ് എപ്പിഫാനസിൻറെ കാലത്ത് നിരന്തര ഹോമയാഗം നിറുത്തലാക്കപ്പെട്ട്, ശൂന്യമാക്കുന്ന മ്ലേച്ഛത സ്ഥാപിക്കപ്പെട്ട്, 2300 സന്ധ്യയും ഉഷസ്സും തികയുവോളം ചവിട്ടിമെതിക്കപ്പെട്ട ശേഷം വിശുദ്ധ മന്ദിരം പുനഃസ്ഥാപിക്കപ്പെടും എന്ന പ്രവചനം ഉണ്ടായിരുന്നു (ദാനീ 8:13-15).

ദാനീ 8:13 അതിന് അവൻ അവനോട്: 2300 സന്ധ്യയും ഉഷസ്സും തികയുവോളം തന്നേ; പിന്നെ വിശുദ്ധ മന്ദിരം യഥാസ്ഥാനപ്പെടും.

ഈ പ്രവചനത്തെ പറ്റി “സന്ധ്യകളെയും ഉഷസ്സുകളെയും കുറിച്ചുള്ള ദർശനം” എന്നാണ് ദാനി 8:24ൽ എഴുതിയിട്ടുള്ളത്. ഇവിടെ പരാമർശിക്കപ്പെടുന്നത് 2300 ദിവസങ്ങളെ പറ്റിയാണെന്ന് വ്യാഖ്യാനിക്കുന്നവരുണ്ട്. 2300 ഉഷസ്സുകളും 2300 സന്ധ്യകളുമാണ് ഉദ്ദേശിച്ചിരുന്നതെങ്കിൽ അത് വ്യക്തമാക്കുമായിരുന്നു. (40 രാത്രിയും 40 പകലും എന്ന് 11 തവണ വ്യക്തമാക്കിയിട്ടുള്ളത് പോലെ. ഉൽ 7:4, 12; പുറ 24:18; 34:28; ആവ 9:9, 11, 18, 25; 10:10; 1രാജാ 19:8; മത്താ 4:2;)

ഇവിടെ പരാമർശിക്കപ്പെടുന്നത് നിർത്തലാക്കപ്പെടുന്ന ഉഷസ്സിലും സന്ധ്യയിലുമുള്ള ബലികളെ പറ്റിയാണ്. അതുകൊണ്ട്, 2300 ഉഷസ്സുകളും സന്ധ്യകളും എന്നത് 1150 (2300 ÷ 2 = 1150) ദിവസങ്ങളെ സൂചിപ്പിക്കുന്നു.

☞ ഓർമ്മിക്കുക: 1150 ദിവസങ്ങൾ.

പഴയകാലത്തെ കലണ്ടറുകൾ

പഴയ കാലത്തെ കലണ്ടർ 365 ദിവസങ്ങളുള്ള നമ്മുടെ ചാന്ദ്ര-സൌര (lunisolar calendar) കലണ്ടർ പോലെ അല്ലായിരുന്നു. നാം 4 വർഷത്തിൽ ഒരിക്കൽ അധിവർഷം എന്ന് പരിഗണിച്ച് ഫെബ്രുവരിക്ക് ഒരു ദിവസം കൂട്ടുമ്പോൾ, 360 ദിവസങ്ങളുണ്ടായിരുന്ന പഴയ ചാന്ദ്ര കലണ്ടറിൽ (lunar calendar) ഒന്നിടവിട്ട വർഷങ്ങളിൽ ഒരു മാസം ചേർക്കുമായിരുന്നു. [അധികമാസം, കൊല്ലവർഷം എന്ന് നാം വിളിക്കുന്ന മലയാളം കലണ്ടറിലും ഇതുണ്ട്.] അതുകൊണ്ടുതന്നെ രണ്ട് തിയതികൾ ലഭിച്ചാൽ അവയ്ക്കിടയിലുള്ള ദിവസങ്ങൾ കണക്കുകൂട്ടുന്നത് എളുപ്പമല്ല.

പഴയ ഗ്രീക്ക് കലണ്ടറുകളിൽ 29, 30 എന്നിങ്ങനെ ഒന്നിടവിട്ടുള്ള 12 മാസങ്ങളുള്ള 354 ദിവസങ്ങളാണ് ഉണ്ടായിരുന്നത് എന്നൊരു തെറ്റിദ്ധാരണ പരന്നിട്ടുണ്ട്. വേദപുസ്തകത്തിൽ പോലും 360 ദിവസങ്ങളുള്ള ചാന്ദ്ര കലണ്ടറാണ് ഉപയോഗിച്ചിട്ടുള്ളതെങ്കിലും, 365 ദിവസങ്ങളുള്ള ചാന്ദ്ര-സൌര കലണ്ടറുമായി പൊരുത്തപ്പെടുത്തുവാൻ അധികമാസങ്ങൾ ഉപയോഗിച്ചിരുന്നു എന്ന് വേണം കരുതുവാൻ (പുറ 9:31; യോശു 3:15).

354 ദിവസങ്ങളുള്ള ചാന്ദ്ര കലണ്ടറിൽ ചാന്ദ്ര-സൌര കലണ്ടറുമായി പൊരുത്തപ്പെടുത്തുവാൻ 19 വർഷങ്ങളിൽ 7 തവണ അധികമാസങ്ങൾ ചേർക്കും. അതിൻറെ കണക്കുകൂട്ടൽ വളരെ സങ്കീർണമാണ്.

ഗ്രീക്ക് ചാന്ദ്ര കലണ്ടറിൻറെ കണക്കുകൂട്ടലുകൾ.

സോലോൺ (Solon) എന്ന തത്വചിന്തകൻ ക്രീസസ് (Croesus) ചക്രവർത്തിയുമായി മനുഷ്യൻറെ ആയുർദൈർഘ്യത്തെ പറ്റി നടത്തിയ ചർച്ചയെ പറ്റി ഹെറോഡൊട്ടസ് എന്ന വിഖ്യാതനായ ഗ്രീക്ക് ചരിത്രകാരൻ എഴുതിയിരിക്കുന്ന വിവരണത്തിൽ നിന്നും വർഷങ്ങളും അധികമാസങ്ങളും [intercalary moth] എങ്ങനെ കണക്കുകൂട്ടണം എന്ന് മനസ്സിലാകും.

“Take seventy years as the span of a man's life. Those seventy years contain 25,200 days without counting intercalary months. Add a month every other year to make the seasons come round with proper regularity, and you will have 35 additional months which will make 1050 days. Thus the total days of your seventy years is 26,250 and not a single one of them is like the next in what it brings.” [ഒരു മനുഷ്യൻറെ ആയുർദൈർഘ്യം 70 വർഷങ്ങളാണെന്ന് കരുതിയാൽ, അധികമാസങ്ങൾ ഒഴികെ അത് 25,200 ദിവസങ്ങളാണ്. കാലാവസ്ഥാ വ്യതിയാനങ്ങൾ കൃത്യസമയത്ത് വരുവാൻ ഒന്നിടവിട്ട വർഷങ്ങളോട് ഒരു മാസം ചേർക്കുക. അങ്ങനെ 35 മാസങ്ങൾ, അല്ലെങ്കിൽ, 1050 ദിവസങ്ങളും കൂടെ ലഭിക്കുന്നു. അങ്ങനെ, നിങ്ങളുടെ 70 വർഷത്തെ ആയുഷ്കാലം 26,250 ദിവസങ്ങളാണെന്ന് കാണാം. അവയിൽ ഒന്നുപോലും മറ്റൊന്നുപോലെ ആയിരിക്കില്ല.”]

ഇതിൽ നിന്നും മനസ്സിലാവുന്നത്:

• ഒരു വർഷം 360 ദിവസങ്ങളാണ്. (25250 ÷ 70 = 360).
• ഒന്നിടവിട്ടുള്ള വർഷങ്ങളിൽ അധികമാസം ഉണ്ട്. (70 ÷ 35 = 2)
• അധികമാസത്തിൻറെ ദൈർഘ്യം 30 ദിവസമാണ് (1050 ÷ 35 = 30).

ശൂന്യമാക്കുന്ന മ്ലേച്ഛത സ്ഥാപിക്കപ്പെട്ടതിൻറെയും ദേവാലയം പുനഃസ്ഥാപിക്കപ്പെട്ടതിൻറെയും തിയ്യതികൾ.

ശൂന്യമാക്കുന്ന മ്ലേച്ഛത സ്ഥാപിക്കപ്പെട്ട തിയ്യതിയും, വിശുദ്ധ മന്ദിരം പുനസ്ഥാപിക്കപ്പെട്ട്, ബലികൾ പുനരാരംഭിച്ച തിയ്യതിയും ഇപ്പോൾ കത്തോലിക്കരുടെ വേദപുസ്തകത്തിൽ കാണപ്പെടുന്ന മക്കബായരുടെ പുസ്തകത്തിൽ ഉണ്ട്. (അയ്യേ, കത്തോലിക്കരുടെ വേദപുസ്തകം വായിക്കരുതെന്ന് നിങ്ങളുടെ പാസ്റ്റർ പറഞ്ഞിട്ടില്ലേ? പാസ്റ്ററിനോട് പ്രൊട്ടസ്റ്റൻറ് പ്രസ്താനത്തിൻറെ സ്ഥാപകരിൽ ഒരാളായ മാർട്ടിൻ ലൂഥറിൻറെ വേദപുസ്തകത്തിൽ കത്തോലിക്കരുടെ വേദപുസ്തകത്തിലുള്ള എല്ലാ പുസ്തകങ്ങളും ഉണ്ടായിരുന്നു എന്ന് പറയുക.)

1മക്കബായർ 1:54: (സെല്യൂസീഡ് രാജാക്കന്മാരുടെ) നൂറ്റിനാൽപത്തഞ്ചാം വർഷത്തിൽ കിസ്ലേവ് (Kislev) മാസം പതിനഞ്ചാം ദിവസം ദഹനബലിപീഠത്തിൻറെ മേൽ അവർ വിനാശത്തിൻറെ മ്ലേച്ഛവസ്തു (ശൂന്യമാക്കുന്ന മ്ലേച്ഛത) പ്രതിഷ്ഠിച്ചു. ചുറ്റുമുള്ള യൂദാ നഗരങ്ങളിലും അവർ ബലിപീഠങ്ങൾ നിർമ്മിച്ചു.

ദേവാലയം പുനഃസ്ഥാപിച്ച് ബലികൾ പുനഃരാരംഭിച്ച തിയ്യതി.

1മക്കബായർ 4:52, 53 നൂറ്റിനാൽപത്തെട്ടാം വർഷം, ഒമ്പതാം മാസമായ കിസ്ലേവിൻറെ ഇരുപത്തഞ്ചാം ദിവസം അവർ അതിരാവിലെ ഉണർന്ന്, പുതിയതായി പണിത ദഹനബലിപീഠത്തിൻറെ മേൽ വിധിപ്രകാരം ബലിയർപ്പിച്ചു.

	വർഷം	മാസം	ദിവസം
ശൂന്യമാക്കുന്ന മ്ലേച്ഛത സ്ഥാപിച്ചത്	145	കിസ്ലേവ്	15
ബലികൾ പുനഃസ്ഥാപിച്ചത്	148	കിസ്ലേവ്	25

കിസ്ലേവ് 15, 145 മുതൽ കിസ്ലേവ് 15, 148 വരെ 360 ദിവസങ്ങൾ വീതമുള്ള 3 വർഷങ്ങൾ	360 x 3 =	1080
പതിനഞ്ചാം തിയ്യതിക്കും ഇരുപത്തഞ്ചാം തിയ്യതിക്കും ഇടയിലുള്ള ദിവസങ്ങൾ	=	10
മൂന്ന് വർഷങ്ങൾക്കിടയിൽ ഉണ്ടാകാവുന്ന രണ്ട് അധികമാസങ്ങൾ	30 x 2 =	60
മൊത്തം		1150

☞ ഓർമ്മയുണ്ടോ: 1150 ദിവസങ്ങൾ?

ഗ്രീക്ക് കലണ്ടറിൽ അധികമാസം വരുന്നത് ഒന്നാമത്തെയും രണ്ടാമത്തെയും മാസങ്ങൾക്ക് ഇടയിലാണ്. കിസ്ലേവ് ഭരണപരമായ കലണ്ടറിൽ മൂന്നാമത്തെ മാസവും, മതപരമായ കലണ്ടറിൽ ഒമ്പതാമത്തെ മാസവുമാണ്. അതായത്, 145 അധികമാസം ഉള്ള വർഷമാണെങ്കിൽ അടുത്ത അധികമാസം ഉള്ള വർഷം 147 ആണ്. അതുകൊണ്ടുതന്നെ ഈ കണക്ക് തെറ്റാം. ഒന്നിടവിട്ടുള്ള വർഷങ്ങളാണ് അധികമാസമുള്ള വർഷങ്ങളെങ്കിൽ അത് ഇരട്ടസംഖ്യകളുടെ ക്രമത്തിൽ ആയിരിക്കണം (2, 4, 6 ...). അങ്ങനെയാണെങ്കിൽ 146, 148 എന്നീ വർഷങ്ങൾ അധികമാസങ്ങളുള്ള വർഷങ്ങളായിരിക്കും. അതുകൊണ്ട് നമ്മുടെ കണക്ക് തെറ്റില്ല.

ഒരുപക്ഷേ നമ്മുടെ കണക്ക് തെറ്റിയാലും, ദേവാലയത്തിൽ ശൂന്യമാക്കുന്ന മ്ലേച്ഛത സ്ഥാപിക്കപ്പെട്ട തിയ്യതിയും, ദേവാലയം (വിശുദ്ധ മന്ദിരം) ശുദ്ധീകരിച്ച്, ബലികൾ പുനഃസ്ഥാപിച്ച തിയ്യതിയും ഫ്ലേവിയസ് ജോസഫസിൻറെ യെഹൂദരുടെ പുരാവൃത്തം 12:5:3-5ലും, 1 മക്കബായരിലും ഉണ്ട്. ദാനീയേൽ 8, 11 അദ്ധ്യായങ്ങളിലെ “ശൂന്യമാക്കുന്ന മ്ലേച്ഛത”യ്ക്ക് അന്തിയോക്കസ് എപ്പിഫാനസിൻറെ കാലത്തിന് ശേഷം യാതൊരു പ്രയോഗക്ഷമതയും ഇല്ല.

അന്തിയോക്കസ് എപ്പിഫാനസിൻറെ കാലത്തെ സംഭവങ്ങളിൽ നിന്നും നാം പഠിക്കേണ്ട സംഗതികൾ:

• വിശുദ്ധസ്ഥലം എന്നത് യെരൂശലേം ദേവലായത്തിലെ വിശുദ്ധസ്ഥലമാണ്, സഭയുടെ പ്രതീകമല്ല.
• ശൂന്യമാക്കുന്ന മ്ലേച്ഛത എന്നത് അയോഗ്യരായ മനുഷ്യർ ദേവാലയത്തിൽ പ്രവേശിക്കുന്നതും അയോഗ്യമായ കാര്യങ്ങൾ നടത്തുന്നതും, ദേവാലയത്തെ അപവിത്രമാക്കുന്നതുമാണ്.
• ദേവാലയം അപവിത്രമാക്കപ്പെട്ടതിന് ശേഷം ഒരു പുനഃസ്ഥാപനം ഉറപ്പുനൽകിയിരുന്നു.
• അന്തിയോക്കസിനെ ചെറുത്തുനിൽക്കുവാനും തോൽപിക്കുവാനും ദേവാലയം പുനഃസ്ഥാപിക്കുവാനും മക്കബായ സഹോദരന്മാരുടെ കീഴിൽ യെഹൂദർക്ക് കഴിഞ്ഞു.

അടുത്തതിൽ: യേശു ഉദ്ദേശിച്ച “ശൂന്യമാക്കുന്ന മ്ലേച്ഛത”.

ക്രിസ്തുവിൽ,

ടോംസാൻ കട്ടക്കൽ.