സാത്താൻറെ യാത്രാപരിപാടി (അഥവാ സാത്താൻസ് ജ്വല്ലറി)

ക്രിസ്തുവിൽ പ്രിയരേ,

സാത്താൻ വളരെ തിരക്കുള്ള കക്ഷിയായിരുന്നു. വേദപുസ്തകത്തിൽ നിന്നും കണ്ടെത്തിയ ടിയാൻറെ യാത്രാപരിപാടി ഇങ്ങനെയാണ്:

[പുതിയനിയമത്തിൽ ആകാശം, സ്വർഗം എന്നിവയ്ക്ക് ഒരേയൊരു ഗ്രീക്ക് വാക്കേയുള്ളു - οὐρανός, (oo-ran-os', ഊറാനോസ്, സ്ട്രോങ്സ് നിഘണ്ടുവിൽ G3772). അതുകൊണ്ട് മലയാളത്തിൽ ഇങ്ങനെയാണ്, ഇംഗ്ലീഷിൽ അങ്ങനെയാണ് എന്ന വാദം നിലനിൽക്കില്ല.]

• ആദത്തിൻറെ വീഴ്ചയ്ക്ക് മുമ്പോ, പിമ്പോ സാത്താൻ സ്വർഗത്തിൽ നിന്നും പുറത്താക്കപ്പെട്ടു പോലും (തെളിവ് ചോദിക്കരുത്, പ്ലീസ്)
• മിക്കവാറും ആദാമിൻറെ വീഴ്ചയ്ക്ക് മുമ്പായിരിക്കണം, ഈ സാത്താൻ കക്ഷി ഏദേൻ തോട്ടത്തിൽ നൂൽബന്ധമില്ലതിരുന്ന ഒരു ദമ്പതികൾക്ക് വസ്ത്രത്തേക്കാൾ അത്യാവശ്യം ആഭരണങ്ങളാണെന്ന് കരുതി ഏദേൻ തോട്ടത്തിൽ സാത്താൻസ് ജ്വല്ലറി നടത്തിയിരുന്നൂ പോലും. (യെഹ 28:13-17).
• ഇയ്യോബിൻറെ കാലത്ത് സാത്താൻ തിരികെ സ്വർഗത്തിൽ എത്തി, ഇയ്യോബിനെ പരീക്ഷിക്കുവാൻ അനുവാദം നേടി, രണ്ടുമൂന്ന് തവണ സ്വർഗത്തിൽ പോയിവന്നൂ പോലും.
• നെബൂഖദ്നേസരിൻറെ പതനത്തിന് മുമ്പ്‍ സാത്താൻ ലൂസിഫറായി സ്വർഗത്തിൽ എത്തുകയും അവിടെനിന്നും വീണ്ടും താഴേയ്ക്ക് തള്ളപ്പെടുകയും ചെയ്തു പോലും.
• വീണ്ടും, അജ്ഞാതമായ രീതിയിൽ, സാത്താൻ സ്വർഗത്തിൽ എത്തി, കാരണം, സാത്താന്‍ മിന്നല്‍ പോലെ സ്വർഗത്തിൽ നിന്നും വീഴുന്നത് അവിടന്ന് കണ്ടു എന്ന് ലൂക്കോസ് 10:18ൽ യേശു പറയുന്നുണ്ട്.
• അങ്ങനെ വീണ സാത്താൻ യൂദാസിൻറെ ഉള്ളിൽ പ്രവേശിച്ചു (ലൂക്കോ 22:3)
• യൂദാസിൻറെ ഉള്ളിലിരുന്നുകൊണ്ട് മറ്റ് ശിഷ്യന്മാരെ കോതമ്പ് പാറ്റുന്നത് പോലെ പാറ്റുവാൻ കൽപന ചോദിച്ചൂ പോലും. (ലൂക്കോ 22:31)
• മിക്കവാറും യൂദാസ് മുന്നോട്ട് വീണ് വയറ് പിളർന്ന് കുടൽ വെളിയിൽ വന്നപ്പോൾ സാത്താനും വെളിയിൽ വന്നിരിക്കണം, ഏതായാലും, അവൻ വീണ്ടും സ്വർഗത്തിൽ എത്തി മീഖായേലുമായി യുദ്ധം ചെയ്തു എന്നും അവിടെ നിന്നും, ഭൂമിയിലേക്ക് തള്ളിയിടപ്പെട്ടു എന്നും വെളിപ്പാട് 12ൽ നാം വായിക്കുന്നു.
• അവൻ പിന്നീട് സ്വർഗത്തിലേക്ക് കയറിപ്പോകാതെ ഇവിടെത്തന്നെ ഉണ്ടായിരുന്നിരിക്കണം. കാരണം, സ്വർഗത്തിൽ നിന്നും ഒരു ദൂതൻ അഗാധത്തിന്‍റെ താക്കോലും ഒരു വലിയ ചങ്ങലയും കൈയില്‍ പിടിച്ചുകൊണ്ട് ഇറങ്ങിവന്ന് അവനെ അഗാധത്തിൽ തള്ളി, 1000 വർഷത്തേക്ക് തടവിലാക്കി.
• ഒടുവിൽ സാത്താനെ, മരണം എന്ന അമൂർത്തമായ (തൊടുവാനും കാണുവാനും കഴിയാത്ത) വസ്തുവിൻറെ കൂടെ തീപ്പൊയ്കയിൽ ഇട്ടു.

ഹാവൂ, എന്തൊരു ആശ്വാസം!

സാത്താൻ എന്ന ക്വട്ടേഷൻ ഗുണ്ട!

സാത്താൻ സ്വർഗത്തിലേക്ക് പോക്കുവരവ് ഉണ്ടായിരുന്നു എന്ന് അവകാശപ്പെടുന്നവർ മറന്നുപോകുന്ന കാര്യം:

സങ്കീ 5:4 നീ ദുഷ്ടതയില്‍ പ്രസാദിക്കുന്ന ദൈവം അല്ല; ദുഷ്ടന്‍ അവിടത്തോട് കൂടെ പാര്‍ക്കുകയില്ല.

അങ്ങനെയുള്ള ദൈവത്തിൻറെ അടുത്തേയ്ക്കാണ് സാത്താൻ പെട്ടിയും കിടക്കയും എടുത്തുകൊണ്ട് ഇടയ്ക്കിടെ പോകുന്നത്!

ദൈവം നമ്മുടെ പിതാവാണ് (അപ്പൻ) എന്നാണല്ലോ നാം വിശ്വസിക്കുന്നത്. കുട്ടികളായിരുന്നപ്പോൾ ഞങ്ങൾ തെറ്റുചെയ്താൽ എൻറെ അപ്പൻ ഞങ്ങളെ  ശിക്ഷിക്കുമായിരുന്നു. (അമ്മമാരുടെ കാര്യം ഇവിടത്തെ വിഷയമല്ല.) നിങ്ങളുടെ അപ്പൻ എങ്ങനെയാണെന്നറിയില്ല, എൻറെ അപ്പൻ ഞങ്ങളെ ശിക്ഷിക്കുവാൻ കൂലിത്തല്ലുകാരെയോ, ക്വട്ടേഷൻ സംഘത്തെയോ ഒരിക്കലും ഏൽപിച്ചിട്ടില്ല. അത്തരക്കാരുമായി ഇടപെടുവാൻ മാത്രം എൻറെ അപ്പൻ തരംതാണിട്ടില്ല. എൻറെ സ്വർഗീയ പിതാവിന് എന്നെ ശിക്ഷിക്കുവാനോ, പരീക്ഷിക്കുവാനോ സാത്താൻ എന്ന ഒരു ക്വട്ടേഷൻ ഗുണ്ടയുടെ ആവശ്യമില്ല.

വേദപുസ്തകത്തിൽ സാത്താനെ പറ്റി എഴുതിയിട്ടില്ലേ?

അപ്പോൾ, വേദപുസ്തകത്തിൽ സാത്താനെ പറ്റി എഴുതിയിട്ടില്ലേ? എന്ന ചോദ്യം ഉയരാം. തീർച്ചയായും എഴുതിയിട്ടുണ്ട്. മുകളിൽ കൊടുത്തിരിക്കുന്ന പട്ടികയിലുള്ള ചില പരാമർശങ്ങൾ സാത്താനെ പറ്റിയല്ല. (ഈ വിഷയങ്ങളെ പറ്റി ഞാൻ ഇതുവരെ മലയാളത്തിൽ അധികം എഴുതിയിട്ടില്ല. ഇംഗ്ലീഷിൽ എഴുതിയിരിക്കുന്നത് ഇവിടെ വായിക്കാം).

യെശയ്യാവ് 14ൽ ലൂസിഫർ എന്ന് ഇംഗ്ലീഷിൽ അഭിസംബോധന ചെയ്തിരിക്കുന്നത് ബാബിലോണിലെ രാജാവിനെയാണ്. ബാബിലോണിലെ രാജാവിൻറെ പിന്നിൽ സാത്താനല്ല, ദൈവമാണ് പ്രവർത്തിച്ചിരുന്നത് (ദാനീ 5:21). ബേല്‍ശസ്സര്‍ രാജാവ് യഹോവയ്ക്ക് വിരോധമായി തെറ്റുചെയ്തതിനുള്ള ശിക്ഷയാണ് യെശയ്യാവ് 14ൽ പ്രവചിക്കപ്പെട്ടിരിക്കുന്നത്. ഇംഗ്ലീഷിൽ King James Version ഒഴികെ വേറൊരു പരിഭാഷയിലും ലൂസിഫർ എന്ന പദമില്ല. ലൂസിഫർ ഒരു ഹീബ്രു വാക്കല്ല, ലത്തീൻ വാക്കാണ്. അപ്പൊ 12:4ൽ പെസഹ എന്ന വാക്കിന് പകരം ജാതികളുടെ ഉത്സവമായ ഈസ്റ്റർ എന്ന് പരിഭാഷപ്പെടുത്തിയത് പോലെയുള്ള ഒരു തെറ്റാണ് ഇതും. ഈ ലൂസിഫർ എന്ന് വിശേഷിപ്പിക്കപ്പെടുന്ന കക്ഷിക്ക് മക്കളും മരുമക്കളും ഉണ്ടായിരുന്നെന്ന് യെശ 14:22ലും, അയാൾ മരിച്ച് എല്ലാവരെയും പോലെ അടക്കപ്പെട്ട്, അയാളുടെ ശവം പുഴുക്കൾക്ക് ആഹാരമാകും എന്ന് യെശ 14:11ലും എഴുതിയിരിക്കുന്നത് വായിക്കുവാൻ സാത്താൻറെ സ്തുതിപാടകർക്ക് എവിടെ സമയം, അല്ലേ?

യെഹെസ്കേൽ 28 സോര്‍ (Tyre, Tyrus) പ്രഭുവിന് വിരോധമായുള്ള പ്രവചനമാണ്. സോര്‍ പ്രഭു ദേവപർവതത്തിൽ കയറി എന്ന് എഴുതിയിരിക്കുന്നത് (യെഹെ 28:14) വായിക്കുമ്പോഴെങ്കിലും സ്വർഗത്തിൽ പർവതങ്ങൾ ഇല്ല എന്നും ദേവപർവതം യെരൂശലേമിലാണ് (ദാനീ 9:16; സെഖ 8:3) ഉള്ളതെന്നും മനസ്സിലാക്കണമെങ്കിൽ വേദപുസ്തകം പഠിക്കണം. (അതെല്ലാം മഹാ മെനക്കേടാണല്ലേ?)

ബാക്കിയുള്ള പരാമർശങ്ങൾ പലതും പ്രതീകങ്ങളാണ്. അവയെ പ്രതീകങ്ങളായി മനസ്സിലാക്കാതിരിക്കുമ്പോഴാണ് വിശ്വാസപ്രമാണങ്ങൾ അപഹാസ്യമായിത്തീരുന്നത്. പ്രതീകങ്ങളെ യാഥാർത്ഥ്യങ്ങളാക്കിയാലേ ഭയം മൂലധനമാക്കിയ മതങ്ങൾക്ക് നിലനിൽക്കാനാകൂ എന്നത് മറ്റൊരു സത്യം.

ദൈവം സ്നേഹമാണ്. ദൈവം നമ്മുടെ പിതാവാണ്. ഓരായിരം കെണികൾ ഒരുക്കിവെച്ചിരിക്കുന്ന ഒരു വക്രബുദ്ധിയല്ല.

സാത്താൻ, പിശാച്. ലൂസിഫർ, പ്രേതം പദങ്ങളും ആശയങ്ങളും വരുന്ന ഓരോ വേദഭാഗങ്ങളെ പറ്റിയും വഴിപോലെ എഴുതാം, കർത്താവിന് ചിത്തമായിരുന്നാൽ.

ക്രിസ്തുവിൽ,

ടോംസാൻ കട്ടക്കൽ.